Áýezov aýdany turǵyndary qala ákimimen kezdeskende ótinish aıtqan edi
Joldaǵy qaýipsizdikke alańdaǵan kópshiliktiń ótinishi kóp kúttirmeı sheshildi. Almaty ákimi Erbolat Dosaevtyń Áýezov aýdany turǵyndarymen júzdesýi kezinde kóterilgen birshama máseleniń túıini tarqalyp keledi, dep habarlaıdy Almaty-akshamy.kz Almaty.tv-ge silteme jasap.
Áýezov aýdanynyń turǵyndary mamyr aıynda ótken kezdesýde jol qaýipsizdigine alańdaǵan edi. Kishi Saın dep atalatyn kóshede aıaq alyp júrý múmkin emes. Kólik júrgizýshileri ózi de tar jolǵa 2 qatar etip temir tulparlaryn qańtaryp qoıady. Onymen qoımaı, jyldamdyqty asarady dep shaǵym aıtqan bolatyn. Kesirinen amaly taýsylǵan halyq barar jerine №31 úıdiń aýlasy arqyly shyǵady eken. Tap sol kezdesý kezinde shahar basshysy aýdan ákimdigi men qalalyq mobıldilik basqarmasyna komısıa quryp, máseleni sheshýdi tapsyrdy.
«Áýezov aýdany turǵyndary qala ákimimen kezdeskende ótinish aıtqan edi. Atap aıtqanda, Jetisý shaǵynaýdany, Tastaq-1 shaǵynaýdanynan jol belgilerin ornatý, jol qaýipsizdigin saqtaý. Qazirgi tańda Almaty qalasy mobıldilik basqarmasymen birigip, atalǵan máseleler oń sheshimin tapty. Jol belgileri ornatyldy. Jetisý shaǵynaýdanynda 3 jol belgisi jáne jyldamdyqty azaıtý belgisi 2 jerge qoıyldy», – dedi Áýezov aýdandyq kóriktendirý bóliminiń bas mamany Áset Japaqov
Áýezov aýdanynda Tastaq -1 shaǵynaýdanynda da týra osyndaı másele. Tóle bıden bastap Shymbolatov kóshesine deıingi aralyqta toqtaýǵa bolmaıdy degen jol belgisi ornatyldy. Sondaı-aq júrgizýshilerge kólikterin qoıýǵa bolmaıtynyn eskertetin jolaq ta syzyldy. Óıtkeni temir tulpar taqymdaǵandar tar kósheniń eki jaǵyna da kólikterin qoıyp ketetin. Nátıjesinde órt sóndirý men jedel járdem qyzmeti óte almaı qınalady eken. Endi bul másele de sheshildi. Aýdan ákimdigi kópti mazalaǵan ózge de suraqtardyń sheshilýine atsalysyp jatyr.