Qazaqstannyń negizgi týrısik oryndarynda 493 qoǵamdyq ájethana jetispeıdi. Bul týraly QR Mádenıet jáne sport vıse-mınıstri Erjan Erkinbaev týrızm qaýymdastyǵynyń ókilderimen kezdesý barysynda aıtty, dep habarlaıdy Almaty-akshamy.kz Inform.kz-ke silteme jasap.
Vıse-mınıstrdiń sózinshe, dárethanalardy jergilikti atqarýshy organdar salýy kerek.
«Qaladaǵy ájethanalardy qalanyń ózi, al ulttyq parkterde – ulttyq saıabaq nemese ınvestor salýy kerek. 2020 jyly biz Qazaqstannyń eń úzdik 10 týrısik baǵytyna zertteý júrgizdik. Nátıjesinde 493 ájethana kerek ekeni anyqtaldy. Sol ýaqytta pandemıa bastalyp, qonaqúıler jabyla bastady. Birinshi kezekte jumys oryndaryn saqtaý máselesi týyndady. Óıtkeni barlyq jerde qysqartý boldy. Keıin «Jumyspen qamtýdyń jol kartasy» baǵdarlamasy ázirlendi. Sonyń aıasynda ákimdikterge ájethana salýdy usyndyq»,- deıdi ol.
Aıtýynsha, jol kartasynyń arqasynda 493 ájethananyń 158-i salyndy.
«Alaıda olar jelilerge qosylmaǵan. Jabyq tur. Álbette, jabyq ájethana kóp synǵa ushyraıdy. Nege? Sebebi, bizde ájethana shyǵyny men ony kútip ustaıtyn qyzmetkerlerge arnalǵan búdjettik baǵdarlama joq», - deıdi Erjan Erkinbaev.
Vıse-mınıstr búginde memleket sanıtarlyq- gıgıenalyq toraptardy ustaýǵa aıyna 83 myń teńge kóleminde sýbsıdıa bóle alatynyn aıtty.
Ol úshin ákimdikter ótinish berýi kerek.
«Biz ájethana máselesin úsh ret joǵary deńgeıde talqylaýǵa shyǵardyq. Endi osy 493 dárethana ár ákimdikke normatıvti túrde bekitildi. Bul baǵdarlama 2025 jylǵa deıin iske asýy kerek edi, biraq biz ony 2023 jyldyń jazyna deıin sheshemiz dep oılaımyn», - dep qosty ol.
Sýret: Inform.kz