Elimizdegi seısmıkalyq qaýip joǵary óńirlerde 7 mıllıonnan astam adam turady jáne onda otandyq ónerkásiptik áleýettiń 50% shoǵyrlanǵan, dep habarlaıdy Almaty-akshamy.kz QazAqparatqa silteme jasap.
«Seısmıkalyq qaýipsizdikti qamtamasyz etý el úshin árqashan basym baǵyttardyń biri bolyp qala beredi. Óıtkeni, Qazaqstan aýmaǵynyń shamamen 40% seısmıkalyq aımaq sanalady. Asa zor qaýip – XIX ǵasyrdyń ekinshi jartysy men HH ǵasyrdyń basynda eń úlken tarıhı jer silkinisi bolǵan eldiń ońtústik-shyǵys aýmaqtarynda. Olardyń epısentrindegi áser etý kúshi 8-10 balǵa jetti. Sondaı-aq búginde Shyǵys Qazaqstanda 8 balǵa deıin, al ońtústik óńirlerde 8-9 balǵa deıin, ortalyq jáne Batys Qazaqstanda 6-7 baldyq jer silkinisi bolýy yqtımal aýdandar bar», - delingen Ashyq NQA portalynda jarıalanǵan Qazaqstanda seısmologıa salasyn damytýdyń 2024-2028 jyldarǵa arnalǵan keshendi josparynda.
Tótenshe jaǵdaılar mınıstrligi usynǵan bıylǵy derekterge saı, seısmıkalyq qaýip joǵary óńirlerde 7 mıllıonnan astam adam turady. Buǵan qosa ol aımaqtarda eldiń ónerkásiptik áleýettiń 50% shoǵyrlanǵan, 400-den astam qalalar men eldi mekender ornalasqan.
«Almaty jáne Shymkent qalalary, Shyǵys Qazaqstan, Jambyl, Qyzylorda, Túrkistan, Almaty, Abaı jáne Jetisý oblystarynyń aýmaqtarynda seısmıkalyq qaýip joǵary. Búkil Ortalyq Azıadaǵy seısmıkalyq qaýipti aımaqtardyń birinde ornalasqan Almaty qalasy apatty jer silkinisterine barynsha beıim», - dep kórsetilgen keshendi josparda.