Shveısarıanyń Qazaqstan ekonomıkasyna salǵan ınvestısıasy 32,6 mlrd dollardan asty, dep habarlaıdy Almaty-akshamy.kz.
«Shveısarıa - Qazaqstannyń eń iri ınvestorlarynyń biri. Ekonomıkamyzǵa tikeleı salynǵan ınvestısıalar 32,6 mlrd dollardan asty. Byltyrdyń ózinde Shveısarıadan elimizge 2,8 mlrd dollar ınvestısıa quıyldy. 300-ge jýyq shveısarıalyq kompanıa Qazaqstanda jumys isteıdi. «Novartis», «Glencore International», «Slariant», «Roche Holding», «SGS», «ABB», «Sika», «Bühler Group», «Stadler» sıaqty kompanıalar – salalyq flagmandar», - dedi QR Premer-Mınıstriniń orynbasary – Syrtqy ister mınıstri Murat Nurtileý shveısarıalyq dıplomattarmen elordada ótken kezdesýde.
Onyń aıtýynsha, ótken jyldyń aıaǵynda «Qazaqstan temir joly» men «Stadler» kompanıasy uzaq merzimdi ınvestısıalyq kelisimge qol jetkizdi.
«Osy oraıda, elimizdiń naryǵyna kirýge nıetti shveısarıalyq kompanıalar úshin eń qolaıly jaǵdaı jasaýǵa daıyn ekenimizdi taǵy da rastaımyn. Shveısarıamen saýda-ekonomıkalyq baılanysymyz da turaqty nyǵaıyp keledi. Byltyr 1,4 mlrd dollar kóleminde bolǵan taýar aınalymy bıylǵy qańtar-mamyrda 544,8 mln dollarǵa jetti», - dedi Murat Nurtileý.
Mınıstrdiń aıtýynsha, jaqynda Astanada Úkimetaralyq komısıanyń kezekti otyrysy ótken jáne qos eldiń İskerlik keńesiniń kelesi basqosýy bıylǵy kúzge josparlanǵan.
«Jan-jaqty áriptestikti nyǵaıtýǵa múddeli ekenimizdi rastap, shveısar tarapyn ekonomıkamyzdyń basym salalaryna ınvestısıa salýǵa shaqyramyz. Ásirese, hımıa-farmasevtıka ónerkásibi, mashına jasaý, aýyl sharýashylyǵy, tamaq ónerkásibi, kólik, ınfraqurylym jáne logıstıka salalarynda yqpaldastyqty damytýdyń pármeni zor», - dedi qazaqstandyq dıplomat.