Almaty ákimdigi komýnaldyq tarıfter boıynsha halyqtyń áleýmettik osal toptary úshin qosymsha qoldaý sharalaryn engizýdi josparlaýda
Almaty qalasynyń ákimi Erbolat Dosaevtyń tapsyrmasy boıynsha halyqtyń áleýmettik osal toptary úshin komýnaldyq qyzmetterge tarıfterdi kóterýge ótemaqy tóleý algorıtmi ázirlendi. Bul týraly baspasóz konferensıasynda Almaty qalasynyń jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov málimdedi, dep habarlaıdy almaty-akshamy.kz
Ákimdiktiń qosymsha tólemderdi engizý jónindegi bastamasy aǵymdaǵy jyldyń 1 shildesinen bastap tozyǵy jetken jelilerdiń problemasyn sheshý úshin qajet komýnaldyq qyzmetterge tarıfterdiń kóterilýimen túsindiriledi jáne "Tarıfter -ınvestısıalarǵa"jalpyhalyqtyq qaǵıdaty aıasynda engiziledi.
"Biz komýnaldyq ınfraqurylymnyń ábden tozýy aıasynda tarıfti kóterýdiń úlken qajettiligi bar ekenin túsinemiz, biraq bul rette Almaty ákimdigi úshin halyqtyń áleýmettik osal toptaryn qoldaý árqashan basymdyqqa ıe. 2023 jyldyń mamyr aıynan bastap Almaty ákiminiń tapsyrmasy boıynsha biz halyqtyń áleýmettik osal toptaryn qoldaý úshin ótemaqy algorıtmin ázirleýdi bastadyq, ony qala máslıhaty da qoldaıdy degen senimdemiz", - dedi B.Jaýbasov.
Halyqtyń áleýmettik qorǵalmaǵan sanattaryna qoldaý sharalaryn kórsetý maqsatynda aǵymdaǵy jyldyń sońyna deıin 316 388 turǵynǵa ótemaqy tóleý josparlanýda (odan ári uzartý 2024 jylǵy búdjetti eskere otyryp qaralatyn bolady). Áleýmettik kómek mólsheri 0,5 AEK quraıdy. Qujattardy qabyldaýdy jáne tóleýdi aýdandyq ákimdikter ótinish berýshilerdiń shottaryna ekinshi deńgeıdegi bankter arqyly júrgizetin bolady.
Máselen, jeke tulǵalar úshin tarıftiń ósýi túbirtek boıynsha kólemi 70 sharshy metr páterde ortasha eseppen 10%-dy quraıdy. 0,5 AEK mólsherindegi ótemaqy 12 pozısıaǵa (sýmen jabdyqtaý, sý burý, gaz, jylytý jáne t.b.) tarıfterdiń kóterilý aıyrmasyn, ıaǵnı barlyq 100% ósimdi jabatyn bolady. 40 sharshy metrlik kólemnen – 110%.
Osylaısha, ákimdik 12 pozısıaǵa (sýmen jabdyqtaý, sý burý, gaz, jylytý jáne t.b.) aǵymdaǵy jáne joǵary tarıfter arasyndaǵy aıyrmashylyqty jabýdy josparlaýda. Osy maqsattarǵa barlyǵy 2,7 mlrd teńge bólinedi.
Qazirgi kezde "Muqtaj azamattardyń jekelegen sanattaryna komýnaldyq qyzmetterge tarıfterdiń ósýin óteýge áleýmettik kómek kórsetý qaǵıdalarynyń" jobasy Almaty qalasy máslıhatynyń kelisimine usynylǵan. Algorıtmge sáıkes qujat NQA portalynda ornalastyrylady, qoǵamdyq saraptama alý rásimderi saqtalady.
Anyqtama: Almatyda halyqtyń áleýmettik osal toptary sanatyna jatatyn 316 388 azamat turady, onyń ishinde UOS ardagerleri - 54 adam (0,02%); basqa memleketter aýmaǵyndaǵy jaýyngerlik is - qımyl ardagerleri - 2978 adam (0,94%); jeńildikter boıynsha UOS ardagerlerine teńestirilgender -1538 adam (0,48%); birinshi jáne ekinshi toptaǵy múgedekter - 28 433 adam (8,9%); múgedek balalary bar nemese tárbıelep otyrǵan otbasylar – 8591 adam( 2,71%); "Altyn alqajáne, "Kúmis alqamen" marapattalǵan kópbalaly analar, kópbalaly otbasylar – 35562 (11,2%); memlekettik nemese qoǵamdyq mindetterdi, áskerı qyzmetti atqarý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý kezinde, quqyqtyq tártipti qorǵaý kezinde qaza tapqan (qaıtys bolǵan) adamdardyń otbasylary - 534 adam (0,16%), jasy boıynsha zeınetkerler - 237 740 adam (75,1%).
Aıta keteıik, 2023 jylǵy jaǵdaı boıynsha Almatyda jylý jelileri 59,2%, sý qubyrlary 54,4%, káriz jelileri 57,4% tozǵan.