Onlaın qyzmet kórsetetin 25 kompanıa bar
Qazaqstanda onlaın aqsha alǵan 28 myń adamnyń nesıesi tolyqtaı keshiriledi. Bul týraly Qarjy naryǵyn retteý jáne damytý agenttigi málimdedi. Elimizde jyl basynan beri mıkroqarjy uıymynan qarjy alǵandardyń qaryzy 45 mıllıard teńgeden asqan, dep habarlaıdy Almaty-akshamy.kz.
Qazaqstanda 246 mıkroqarjy uıymy men tek onlaın qyzmet kórsetetin 25 kompanıa bar. Olar jyl basynan beri 100 mıllıard teńgeden astam shaǵyn nesıe bergen. Biraq, onyń 45 mıllıardtan astamy áli tolyq ótelmegen. Osyny eskergen Qarjy naryǵyn retteý jáne damytý agenttigi jyl sońyna deıin 28 myń adamnyń nesıesin keshirmek, dep habarlaıdy Astana telearnasy.
«432 myń qaryz alýshy mıkrokredıt boıynsha 33,1 mıllıard teńge sommasyndaǵy problemalyq bereshekti qaıta qurylymdaý, kepilsiz mıkrokredıtter boıynsha 107 myń qaryz alýshynyń 0,8 mıllıard teńgesi ishinara esepten shyǵarý jáne 28 myń qaryz alýshynyń 600 mıllıon teńge sommasynda qaryzyn esepten shyǵarý kózdeledi», - dedi QR Qarjy naryǵyn retteý jáne damytý agenttigi departamentiniń dırektory Dáýren Násimbaev.
Al ekonomıs Ǵalymjan Kerimbek shaǵyn nesıeni keshirý jeke azamattar úshin tıimdi shara bolǵanymen, el bolashaǵy úshin qaýipti ekenin aıtady.
«Biz bul máselemen qoǵamnyń aldyndaǵy masyldyqtan arylmaımyz. Munyn aldynda da osyndaı máseleler oryn alyp, ol kezde de biraq nesıeler keshirilgen edi. Endi biz osy shara arqyly jeke tulǵanyń, zańdy tulǵanyń memleket aldyndaǵy jaýapkershiligin biz azaıtamyz», deıdi ekonomıka ǵylymdarynyń doktory Ǵalymjan Kerimbek.
Elimizde onlaın qaryz berýshiler týraly naqty málimet, biryńǵaı aqparattyq baza joq. Jarnamasy ınternette qaptaǵan mundaı uıymdar óz jumystary týraly memlekettik organdarǵa esep bermeıdi. Komısıa kólemin de óz qalaýynsha qubyltady. Sondyqtan qarjy stýdentterge de, jumyssyz júrgen jastarǵa da berile beredi. Al ony tóleı almaǵan adam zań aldynda jaýap beredi.