Shotlandıanyń Glazgo qalasynda tenısten komandalyq álem chempıonaty – Bıllı Djın Kıng kýbogynyń fınaldyq kezeńinde S tobynda Qazaqstan Ulybrıtaıa quramasyn utty, dep habarlaıdy Almaty-akshamy.kz QazAqparat-qa silteme jasap.
Ekinshi kezdesýde Qazaqstannyń birinshi, álemniń 22-raketkasy Elena Rybakına men dúnıejúzilik reıtıńte 98-satyda turǵan Herrıet Dart kortqa shyqty.
Osyǵan deıin qarsylastardyń eki márte joldary toqaılasqan. Ekeýinde de qazaqstandyq tenısshi brıtandyqtan aılasyn asyrdy.
Birinshi partıada esep 1:1 bolǵannan keıin E.Rybakına des bermeı, qatarynan bes geımdi aldy - 6:1.
Ekinshi setti qazaqstandyq sportshy 2:0 esebimen sátti bastaǵanymen, Dart tarazy basyn teńestirdi. Esep 4:4 bolǵan mezette Elena taǵy bir breıkke qol jetkizdi. Sodan keıin machqa dop bergende, múmkindigin jibergen joq – 6:4.
Osylaısha, Qazaqstan 2:0 esebimen alǵa shyǵyp, jeńisti qamtamasyz etti. Endi qalǵan juptyq báseke eshteńeni sheshpeıdi.
Sársenbi kúni qazaqstandyq qyzdar S tobynda Ispanıamen sheberlik baıqasady. Ony jeńse, jartylaı fınalǵa joldama alady.
Tenısten ÁCH: Qazaqstan Ulybrıtanıa quramasyn jeńip ketti
- Avtor Almaty-akshamy
- 02:20, 09 qarasha 2022
Sýret: Inform.kz