Bul - jalpy sottalǵandardyń 9 paıyzy.
Qazaqstanda 2500-den astam sottalýshyǵa elektrondy bilezikter qoldanylady. Bul - jalpy sottalǵandardyń 9 paıyzy. Muny İshki ister mınıstrliginde ótken brıfıń aıasynda Qylmystyq-atqarý júıesi komıteti probasıa qyzmeti bastyǵynyń orynbasary Berik Bakýlın aıtty, dep habarlaıdy Almaty-akshamy.kz QazAqparatqa silteme jasap.
«Qazirgi ýaqytta elektrondy bilezikter 2500-den astam adamǵa qoldanylady. Bul - jalpy sottalǵandardyń 9 paıyzy. Al búgingi kúni probasıa qyzmetiniń esebinde 28 myńnan astam adam tur. Olardyń ishinde 326 azamat kámeletke tolmaǵandarǵa qatysty jynystyq quqyqbuzýshylyq jasaý baptar boıynsha sottalǵan. Sonymen qatar, 7 aı ishinde elektrondy bilezikterdi paıdalaný nátıjesinde 90 zań buzý faktisi anyqtaldy. Osyǵan baılanysty 30 materıal jınaqtalyp, olar sot organdaryna jiberildi. Atap aıtqanda, olarǵa qoldanylǵan jaza endi bas bostandyǵynan aıyrý jazasymen almastyrylady. Osynyń nátıjesinde qazirgi ýaqyttyń ózinde sottalǵan 6 adam jazasyn temir torda óteýde», - dedi Berik Bakýlın.
Elektrondy bilezikterdiń kómegimen kún saıyn sottalýshynyń júrip-turýy qadaǵalanady. Berik Bakýlınniń dereginshe, eger sottalǵan adam saǵat 22:00-den keıin turǵylyqty jerinen shyqsa, onda polısıa qyzmetkerleri sottalǵan azamatqa qońyraý shalyp, úıge oralýyn talap etedi. Ol qoldanylǵan mundaı shara sottalýshylardyń qaıta qylmys jasaýynyń aldyn alýǵa múmkindik beretinin atap ótti.