Memleket basshysynyń tapsyrmasyna sáıkes taıaýdaǵy úsh jyl ishinde Qazaqstanda 1300-ge jýyq mektep renovasıalanady, onyń jartysynan kóbi (54%) aýyldyq jerlerde ornalasqan, dep habarlaıdy aqshamnews.kz.
Bul týraly QR Oqý-aǵartý mınıstrliginiń baspasóz qyzmeti málemdedi.
Joba qazirgi zamanǵy bilim berý standarttaryna sáıkes keletin toǵyz negizgi baǵyt boıynsha iske asyrylýda. Renovasıadan ótkizý mektepterdi kúrdeli jóndeý, zamanaýı pándik kabınettermen jabdyqtaý, mektep jıhazdaryn jańartý, kitaphanalar men asqanalardy jańǵyrtý, sport zaldaryn salý nemese rekonstrýksıalaý, rekreasıalyq aımaqtar men qoǵamdyq keńistikterdi jabdyqtaý, sondaı-aq jańa qaýipsizdik júıelerin engizý kózdelgen.
«Memleket jyl saıyn mektep ınfraqurylymyn jaqsartýǵa qarajat bóledi. 2025 jyly jańartý 262 mektepti qamtıdy, onyń 141-i aýyldyq jerlerde ornalasqan. Jańartylǵan ǵımarattarda 200 myńǵa jýyq oqýshy bilim alady», - dep atap ótti ınfraqurylymdy damytý departamenti dırektorynyń orynbasary Roza Sembaeva.
Jumystar aıasynda shatyrdy aýystyrý, qasbetter men terezelerdi jańartý, ınjenerlik komýnıkasıalardy — jylytý, sýmen elektrmen jabdyqtaý, káriz ben jeldetý júıelerin kúrdeli jóndeý josparlanǵan. Sondaı-aq mektep aýmaqtaryn kórkeıtý jáne kógaldandyrý júrgiziledi.
Joba úsh jylǵa eseptelgen: 2025 jyly 262 mektep jańartylady, 2026 jyly – 436, 2027 jyly – 466. Sonymen qatar 2028-2029 jyldary Jambyl oblysynda taǵy 67 mektepti jańartý josparlanýda.