Ál-Farabı atyndaǵy Qazaq ulttyq ýnıversıteti – elimizdegi jetekshi bilim jáne ǵylym ordalarynyń biri. Ýnıversıtet qabyrǵasynda ótkiziletin árbir is-shara jas urpaqtyń jan-jaqty damýyna, bilim men ǵylymǵa degen qyzyǵýshylyǵyn arttyrýǵa baǵyttalǵan. Osyǵan dálel retinde 2025 jyldyń 27 aqpanynda QazUÝ-dyń Fılosofıa jáne saıasattaný fakúltetinde ótken Uly Jeńistiń tarıhı mańyzy men rýhanı qundylyqtaryn zerdeleýge arnalǵan tárbıe saǵatyn atap ótýge bolady.
İs-shara barysynda Uly Otan soǵysynyń sebepteri men negizgi kezeńderi jan-jaqty talqylanyp, onyń tarıhı sabaqtary keńinen qarastyryldy. Sonymen qatar, Jeńistiń qazaq qoǵamy úshin mańyzdylyǵy, maıdangerlerdiń erligi, soǵys jyldaryndaǵy halyqtyń birligi men tózimdiligi erekshe nazarǵa alyndy. Bul kezeń – tek qazaq halqynyń ǵana emes, tutas Otanyn súıgen halyqtardyń rýhyn asqaqtatqan syndarly shaq boldy.
Tárbıe saǵaty aıasynda stýdentter tarıhı derekter men estelikter negizinde oı-pikir almasyp, suraq-jaýap formatynda qyzý pikirtalas júrgizdi. Biri soǵystyń aýyr kezeńderin eske alyp, ekinshi dúnıejúzilik soǵystyń sebep-saldaryn taldasa, endi biri maıdangerlerdiń erligin bolashaq urpaqqa jetkizýdiń mańyzdylyǵyna toqtaldy. Ásirese, sol kezeńdegi halyqtyń birligi men tabandylyǵy týraly sóz qozǵalǵanda, árbir qatysýshynyń júreginde maqtanysh sezimi oıandy.
Interaktıvti bólim sharanyń mazmunyn baıytyp, stýdentterdiń bilimderin synaýǵa, Uly Jeńistiń qundylyqtaryn tereńirek túsinýge múmkindik berdi. Jeńistiń rýhanı jáne áleýmettik mańyzyna qatysty pikirtalas barysynda jas urpaq maıdangerler erligin umytpaı, soǵys tarıhyn dáripteý qajettigin atap ótti.
Pedagogıkalyq praktıka jetekshim, fılosofıa ǵylymdarynyń doktory, profesor Borbasova Q.M. stýdentterdiń bul taqyrypqa degen qyzyǵýshylyǵy men tereń bilimderin kórsete bilýin erekshe atap ótti. Atalǵan shara tarıhymyzdyń búgingi urpaq úshin mańyzdylyǵyn taǵy bir márte dáleldep, olardyń ulttyq qundylyqtarǵa degen súıispenshiligin arttyrdy.
Uly Jeńistiń tarıhı mańyzy men rýhanı qundylyqtaryn keler urpaqqa jetkizý – bizdiń basty mindetimiz. Bul tárbıe saǵaty stýdentterge maıdangerler erligi men eldiń birligin saqtaýdyń mańyzyn túsindirip, bolashaqta el ıgiligi úshin aıanbaı qyzmet etýge shaqyrdy.
Ál-Farabı atyndaǵy Qazaq ulttyq ýnıversıteti – bilim men ǵylymnyń toǵysqan ortalyǵy. Ýnıversıtet stýdentterge tek teorıalyq bilim berip qana qoımaı, olardyń zertteýshilik qabiletterin damytyp, básekege qabiletti maman retinde qalyptasýyna múmkindik jasaıdy. Doktorant retinde osyndaı is-sharalardyń ótkizilýine rızashylyǵymdy bildiremin. Bul sekildi taǵylymdy kezdesýler ýnıversıtettiń halyqaralyq deńgeıdegi bedelin arttyryp, bilim berý sapasynyń joǵary ekenin taǵy bir márte dáleldeıdi.
Ál-Farabı atyndaǵy QazUÝ,
Dintaný jáne mádenıettaný kafedrasynyń profesory, fılos.ǵ.d. Borbasova Qarlyǵash Moldaǵalıqyzy,
Dintaný mamandyǵynyń 1-kýrs doktoranty
Beısembaeva Aıman Muratqyzy