Májilis depýtaty Baqytjan Bazarbek aýyl sharýashylyǵy salasyndaǵy sýbsıdıalaý máselesine qatysty qatty syn aıtty. Onyń pikirinshe, elimizdegi sýbsıdıa bólý júıesindegi bylyqtar eldiń ekonomıkalyq damýyn tejep, halyqtyń senimin shaıqaltýda, dep habarlaıdy aqshamnews.kz
Baqylaý jumystary barysynda aýyl sharýashylyǵyndaǵy sýbsıdıalaý júıesiniń soraqy mysaldary anyqtaldy. Bir ǵana Almaty oblysynda sýbsıdıa alý úshin keıbir sheneýnikter mal basynyń sanyn jasandy túrde arttyrǵan. Absýrdtyń shyńy – 1914 jyly týǵan sıyrǵa sýbsıdıa berilýi. Bul degenimiz – 108 jyl ómir súrgen sıyr, bálkim, Amangeldi Imanov kóterilisi men Birinshi dúnıejúzilik soǵystyń kýási bolǵan mal.
«Sýbsıdıa alý úshin 100 jyldan astam ýaqyt ómir súrgen maldy tirkeý – memlekettik resýrstardy talan-tarajǵa salýdyń eń ashyq mysaly. Mundaı derekter elimizdiń barlyq aımaqtarynda kezdesedi», – dep ashyndy depýtat.
Tekserý barysynda sýbsıdıanyń bankrotqa ushyraǵan, jalǵan tirkelgen jáne tipti qaıtys bolǵan adamdardyń atyna aýdarylǵany anyqtaldy. 254 mln teńge 148 ótinim boıynsha joıylǵan kompanıalarǵa berilse, Túrkistan oblysy men Shymkentte 968 kásiporyn sýbsıdıa alǵannan keıin jumysyn toqtatqan.
«Ýdobrenıege qatysty sýbsıdıa bólý máselesin quqyq qorǵaý organdary erekshe baqylaýǵa alýy kerek. Bul jerde uıymdasqan qylmystyq toptardyń bar ekeni anyq», – deıdi Bazarbek.
Depýtat aýyl sharýashylyǵyndaǵy sýbsıdıalaý júıesin tolyq qaıta qarap, ashyqtyqty qamtamasyz etýdi usynady. Sonymen qatar, osyndaı zań buzýshylyqtarǵa jol bergen sheneýnikter men kompanıalarǵa qatań shara qoldanýdy talap etedi.
Búgingi tańda mundaı absýrdty jaǵdaılar tek halyqtyń narazylyǵyn týdyryp qoımaı, aýyl sharýashylyǵy salasyndaǵy bedelge nuqsan keltirip otyr. El úmit artqan aýyl sharýashylyǵy salasy qatań reformalardy qajet etedi.