Bul jaıynda federasıanyń bas hatshysy, halyqaralyq dárejedegi tóreshi Ermek Syrlybaev keńirek aıtyp berdi.
Qytaıda ótken jazǵy Azıa oıyndarynda voleıboldan Qazaqstan komandasy aıtarlyqtaı tómen nátıje tirkedi. Áıelder quramasy 8-orynǵa taban tirese, erler 9-satyǵa turaqtady. Voleıboldaǵy bul kórsetkish kezdeısoq emes. Sońǵy jyldary Qazaqstan komandalyq sport túrlerinen artqa ketip barady. Álemdi aıtpaı-aq, bizdiń sportshylarǵa qurlyqta júlde alý múmkin bolmaı tur, dep habarlaıdy Almaty-akshamy.kz.
Al 2008 jyly Beıjiń Olımpıadasyna qatysyp, 2010 jyly Azıa oıyndarynda úzdik úshtikke engen, álemdik Gran-prı serıalarynda áıgili Brazılıadan qaımyqpaǵan voleıbolshy qyzdardyń búgingi hali tym múshkil. Komanda menedjeri Ermek Syrlybaevtyń aıtýynsha, dál qazir olardan úlken nátıje kútýdiń ózi – uıat nárse.
«Voleıboldan nátıjeniń nasharlaýyna eń basty sebep – qarjynyń jetkiliksizdigi. Buryn basshylyq klasıkalyq jáne jaǵajaı voleıbolyn tolyqtaı qarjylandyratyn. Qazir biz ózimizge qajetti somanyń 25 paıyzyn ǵana alyp otyrmyz. Osynyń saldarynan, tolyqqandy oqý-jattyǵý jıyndary ótpeıdi, halyqaralyq machtardy qabyldaı almaımyz, álemdik jarystardan syrt qalamyz. Bul – ekinshi sebep. Al ınfraqurylymnyń jetkiliksizdigi – úshinshi sebep. Bizdiń oqý-jattyǵý jıynyn ótkizetin bazamyz da joq. Osydan keıin voleıbolshylardan qalaı júlde kútemiz? Maqtanatyn medalimiz joq! Tipti, oıynshylardyń jalaqysyn da ýaqytyly tóleı almaımyz», - deıdi Syrlybaev.
Komanda menedjeriniń aıtýynsha, voleıbolshylar qazir álemdik federasıa kúntizbesindegi iri jarystarǵa qatyspaıdy. Buǵan da qarjynyń joqtyǵy qolbaılaý bop otyr.
Klasıkalyq voleıbol sheberleri kem degende tórt halyqaralyq týrnırge qatysýy tıis. Al jaǵajaı voleıbolynan jarys, tipti, kóp. Burynǵydaı álemdik týrlarǵa qatysatyn aqsha joq, sondyqtan, Azıadaǵy jarystarmen shektelemiz. Iá, komandanyń aıy ońynan týyp turǵanda álemdik Gran-prı týrnırlerine qatystyq. Al qazir bul doda biz úshin arman bop qaldy. Sebebi, álemdik reıtıńte kúrt tómendep kettik. Álemdik reıtıń boıynsha alǵashqy 24 komandanyń qataryna kirmegendikten, Ulttyq lıga (burynǵy álemdik Gran-prı jáne Álemdik lıga) kezeńderine qatysa almaımyq. Bul týrnırlerge joldama alý úshin mańyzdylyǵy jóninen FIVB-daǵy ekinshi týrnır sanalatyn Challenge Cup básekesinde top jarý kerek. Ókinishke qaraı, áıelder komandasy eýropalyqtardan utyldy. Al erlerimiz bul jarysta sońǵy ret 2019 jyly oınaǵan, - deıdi ol.
Ermek Syrlybaev qarajattyń azdyǵyna qaramastan, elimizdegi klýbtyq jarystardyń jaqsy deńgeıge kóterilgenin jáne balalar lıgasynyń qarqyndy damyp kele jatqanyn tilge tıek etti.
Biz klýbtyq deńgeıde óte jaqsy oınap júrmiz. «Altaı» men «Qýanysh» áıelder komandasy Azıa chempıony atanyp, klýbtar arasyndaǵy álem chempıonatynda sary qurlyq namysyn qorǵady. Erlerden «Petrel» qola júldeger atansa, «Taraz» tórtinshi orynǵa ıe boldy. Sondaı-aq elimizdegi balalar lıgasyna bar kúshimizdi salýdamyz. Óıtkeni, bizde basqa sport túrlerine qaraǵanda voleıbolmen aınalysatyn balalar sany óte kóp. Qazaqstannyń barlyq aımaǵynda derlik voleıbol qarqyn alyp keledi. Sondyqtan, rezerv bar. Balalar arasyndaǵy Qazaqstan chempıonatyna qatysatyn komandalar sany da júzge jetip jyǵylady. Al bıyl jaǵajaı voleıbolynan rekord ornady. Balalar chempıonatyna 150 komanda qatysty. Bizdiń maqsat - osy negizdi joǵaltpaı, jas balalardan ulttyq qurama deńgeıine deıin ósetin myqty sportshyny tárbıeleý, - deıdi maman.
Voleıboldan ulttyq qurama menedjeri elimizdegi sportty damytý úshin basqarýdyń jahandyq júıesine tolyǵymen kóshý kerektigin qadap aıtty.
Ulttyq Olımpıada komıteti elıtalyq sport túrleri úshin jaýapkershilikti óz moınyna alýǵa mindetti. Týrızm jáne sport mınıstrligi sportty damytýdyń jáne ulttyq quramalardyń rezervterin daıyndaýdyń zańnamalyq negizi bolyp tabylady. Buqaralyq sport Bilim, Oqý-aǵartý jáne Densaýlyq saqtaý mınıstrliginiń quzyrynda bolýy kerek. Komandalyq sportty damytý úshin balalar men jasóspirimderge arnalǵan mamandandyrylǵan mektepterdi qaıtarý kerek. Sportty damytýdyń naqty jospary bolsyn. Tolyq qarjylandyrý qajet. Zamanaýı, tolyq jabdyqtalǵan ınfraqurylym bolýy kerek. Kásibı jattyqtyrýshylardy daıyndaýǵa erekshe kóńil bólsek, utylmaımyz. Bul rezervpen jumys isteý úshin qajet. Medısınalyq turǵydan tolyǵymen qamtyp, sportty ǵylymı-zertteý ınstıtýtyn qursaq, murtymyzdy balta shappaıdy. Sondaı-aq, bizge sport psıhologtary men dıetologtar asa qajet, - dedi Ermek Syrlybaev.