Qazirgi tańda álemdi boljaý múmkin emes jáne bizdiń elimiz jańa synaqtarǵa tap bolýda.
Álemdik ekonomıka geosaıası táýekelder men turaqty joǵary ınflásıa aıasynda qyzmet jasaýdy jalǵastyrýda. Degenmen Qazaqstan ekonomıkasy uzaq ýaqyt boıy «ortasha tabystyń tuzaǵynda». Mundaı jaǵdaılarda ekonomıkalyq damýdyń tekserilgen josparyn qalyptastyrý qajettiligi artady. Memleket basshysy Qazaqstan halqyna Joldaýynda qazaqstandyqtardyń ıgiligi úshin qurylatyn jańa ekonomıkalyq modeldi usyndy.
Birinshiden, ekonomıkalyq ósýdiń jańa núkteleri anyqtaldy. Ekonomıkalyq saıasattyń nazary negizgi dástúrli salalardy (ónerkásip, aýyl sharýashylyǵy) transformasıalaýǵa da, «jasyl» sektordyń aýqymyn keńeıtýge de baǵyttalatyn bolady.
Sonymen qatar orta kásipkerlik te qarqyndy damýy kerek. Mysaly, Qazaqstannyń JİÓ-degi orta bıznestiń úlesi 10%-dan az, al EYDU memleketterinde olardyń úlesi 20%-ǵa jetedi. Osylaısha jańa ekonomıkalyq saıasat paradıgmasyna ınovasıalar men sıfrlyq transformasıanyń jańa tolqyny engizildi.
Ekinshiden, jańa bastamalar men jobalardy júzege asyrý úshin qarajat qajet. Prezıdent Joldaýy Qazaqstan ekonomıkasy úshin qosymsha qarjylandyrýdy tartýǵa múmkindik beretin birqatar naqty sharalar men strategıalardy usyndy.
Qazirgi ýaqytta qarjy sektory ınvestısıalyq úderiske qatysý deńgeıi tómen, bul másele boıynsha úlken jaýapkershilik memlekettik búdjetke júkteledi. Búgingi tańda elde 21 bank jumys isteıdi, al ekonomıkalyq jobalardy qarjylandyrýmen az bóligi ǵana aınalysady. Osylaısha bankterdiń ekonomıkaǵa belsendi qatysýy úshin memlekettik organdar iri ınvestısıalyq jobalardy qarjylandyrý kezinde damý ınstıtýttarynyń kepildikterin berý máselesin pysyqtaıtyn bolady.
Álemdik tájirıbede «uzyn aqshanyń» mańyzdy kózi – baǵaly qaǵazdar naryǵy. Osy turǵydan alǵanda, eki qor bırjasyn biriktirý bastamasy ishki qor naryǵynyń ınvestısıalyq tartymdylyǵy men tıimdiligin arttyrý quraly retinde qarastyrylýy qajet.
Úshinshiden, kez kelgen eldiń ekonomıkasynyń eń qundy resýrsy – adamı kapıtal. Qazaqstan búginde eldiń bolashaǵyn aıqyndaıtyn halyqtyń jynystyq-jas qurylymynyń ózgerýine tap bolyp otyr. Elimizde jyl saıyn 400 myńnan astam bala týady. Aldaǵy jyldary belsendi jas kezeńine 2000 jyldary týylǵan jas býyn kiredi. Qazaqstan úshin bul demografıalyq jaǵdaı – ekonomıkalyq paıda taýyp, damýdyń jańa deńgeıine shyǵý múmkindigi. Adamnyń qajettilikterine baǵyttalǵan ekonomıkany damytý – Memleket Basshysy Joldaýda erekshe nazar aýdarǵan másele. Ekonomıkalyq saıasattyń negizgi basymdyǵy sapaly bilim alý úshin múmkindikterdi keńeıtý, eńbek naryǵyn jańa shyndyqqa beıimdeý jáne jumyspen qamtýdyń jańa nysandaryn damytý bolýy tıis.