Premer-Mınıstr Oljas Bektenov jańa ıpotekalyq baǵdarlamany iske qosý jáne jyljymaıtyn múlikke suranysty yntalandyrý úshin jalǵa beriletin turǵyn úı tetigin iske asyrý jóninde sharalar qabyldaýdy tapsyrdy.
Bıyl Memleket basshysy Qasym-Jomart Toqaev Úkimet aldyna elimiz boıynsha 18 mln sharshy metr turǵyn úıdi paıdalanýǵa berýdi qamtamasyz etý mindetin qoıdy, dep habarlaıdy Almaty-akshamy.kz Primeminister.kz-ke silteme jasap.
Prezıdent alǵa qoıǵan mindetterdi oryndaý aıasynda bıylǵy 1 naýryzdan bastap Otbasy banki «Otaý» baǵdarlamasyn iske qosty. Sharttarǵa sáıkes, qazaqstandyqtar Astana men Almaty qalalary úshin 30 mln, basqa óńirler úshin 18 mln jyldyq 9%-ben jáne halyqtyń áleýmettik jaǵynan osal toptary úshin 7%-ben turǵyn úı nesıesin rásimdeı alady.
18 sáýirdegi jaǵdaı boıynsha bank baǵdarlamaǵa qatysýǵa 18 729 ótinim qabyldady. Jyljymaıtyn múlik baǵasynyń ósýin tejeý úshin qurylys salýshylardy Baspana Market platformasynda ornalastyrý kepil quny kelisilgennen keıin ǵana júzege asyrylatyn bolady.
Jańa turǵyn úı baǵdarlamalaryn iske qosý jyljymaıtyn múlikke suranysty arttyrýǵa múmkindik beredi. Osyǵan baılanysty Ónerkásip jáne Saýda mınıstrlikterine Básekelestikti qorǵaý agenttigimen birlesip, bir aı merzimde jyljymaıtyn múlik jáne qurylys materıaldary naryǵynda dúrbeleńge jol bermeý úshin qajetti sharalardy qabyldaý tapsyryldy.
Oljas Bektenov nazar aýdarǵan mańyzdy másele – salynyp jatqan qurylystyń sapasy. Jalǵa berilgen turǵyn úıge qonystanǵannan keıin kezdesetin máselelerdi qurylys salýshylar sheshýi kerek.
«Taǵy bir mańyzdy másele – qurylystyń sapasy men onyń zańnamaǵa sáıkes bolýy. Qurylys kompanıalary ózderine alǵan mindettemeni tolyq oryndaýǵa jáne qurylystyń sapasyn qamtamasyz etýge mindetti. Qandaı da bir kemshilikter anyqtalsa, olardy tez arada joıyp otyrýy kerek. Ónerkásip mınıstrligi múddeli memlekettik organdarmen birlesip, bir aı merzimde zańsyz qurylys júrgizgeni úshin qurylys kompanıalary men laýazymdy tulǵalarǵa yqpal etý sharalaryn qatańdatý jóninde zańnamalyq túzetýler ázirlesin. Olardy Qurylys kodeksiniń jobasyna engizý qajet», — dep atap ótti Oljas Bektenov.