Bakýde Túrki memleketteri uıymynyń (TMU) otbasy jáne áleýmettik saıasat máselelerine jaýapty mınıstrleri men mekeme basshylarynyń ekinshi otyrysy aıaqtaldy.
Jıynǵa Qazaqstan, Ázerbaıjan, Majarstan, Qyrǵyzstan, Tájikstan, Túrikmenstan jáne Túrkıa ókilderi qatysty, dep habarlaıdy aqshamnews.kz.
Bıylǵy jıynnyń taqyryby – «Qazirgi qoǵamdaǵy áıelderdiń róli: turaqty damý jáne dástúrli qundylyqtar».
Halyqaralyq kezdesýdiń maqsaty – túrki halyqtary arasynda áıelder men otbasyna qatysty saıasat salasynda ortaq qundylyqtar boıynsha yntymaqtastyqty nyǵaıtý jáne tereńdetý.
QR Mádenıet jáne aqparat mınıstrliginiń Jastar jáne otbasy isteri komıtetiniń tóraǵasy Qaırat Qambarov Qazaqstannyń genderlik jáne otbasylyq saıasatynyń negizgi baǵyttarymen tanystyrdy. Ol Memleket basshysy Qasym-Jomart Toqaev bul máselelerge aıryqsha kóńil bóletinin atap ótip, elde genderlik teńdik ornatyp, otbasy ınstıtýtyn nyǵaıtý úshin qajetti zańnamalyq jáne ınstıtýsıonaldyq negizder jasalǵanyn aıtty.
Otyrys barysynda basqa elderdiń ókilderi de óz tájirıbelerimen bólisti. Sonymen qatar, delegattar alǵashqy otyrys Deklarasıasynyń oryndalý barysyn, birlesken jobalar men oqytý baǵdarlamalaryn talqylady. Sondaı-aq, áıelderdiń áleýmettik-ekonomıkalyq rólin arttyrý, dástúrli qundylyqtardy saqtaý, otbasylardy sıfrlandyrýmen baılanysty jahandyq qaýip-qaterlerden qorǵaý máseleleri de kún tártibinde boldy.
Kezdesý qorytyndysy boıynsha, TMU aıasyndaǵy otbasy jáne áleýmettik saıasat máselelerine jaýapty mınıstrler men mekeme basshylarynyń úshinshi otyrysyn 2026 jyly Qazaqstanda ótkizý týraly sheshim qabyldandy.