Memleket basshysy «QazMunaıGaz» UK» AQ basqarma tóraǵasy Maǵzum Myrzaǵalıevti qabyldady.
Qasym-Jomart Toqaevqa kompanıanyń 2023 jylǵy operasıalyq jáne qarjylyq qyzmetiniń qorytyndysy týraly esep berildi. Berilgen málimetterge sáıkes, byltyr "QazMunaıGaz" 2022 jylmen salystyrǵanda negizgi óndiristik kórsetkishter boıynsha ósimge qol jetkizgen, dep habarlaıdy almaty-akshamy.kz.
Prezıdentke Qazaqstan munaıynyń eksporttyq baǵyttaryn damytý isi jóninde baıandaldy. Atap aıtqanda, Germanıaǵa jáne Ázerbaıjan baǵytyna "Baký – Tbılısı – Djeıhan" munaı qubyry arqyly shıkizat jetkizile bastady. Sondaı-aq Birikken Arab Ámirlikterindegi seriktestermen birlesip, tanker flotyn keńeıtý jumystary júrgizildi.
Memleket basshysyna taýarlyq gaz óndirisin arttyrý jáne ishki naryqqa munaı ónimderin úzdiksiz jetkizýdi qamtamasyz etý, sondaı-aq ınvestısıa tartý, munaı-gaz hımıasy jobalaryn damytý jónindegi tapsyrmalarynyń oryndalý barysy jaıynda málimet berildi.
Budan bólek, Qasym-Jomart Toqaevqa "QazMunaıGaz" kompanıasynyń kásiporyndary ornalasqan óńirlerde júzege asyrylyp jatqan áleýmettik jobalar týraly aıtyldy. Máselen, Prezıdentke "Astrahan – Mańǵyshlaq" magıstraldy sý qubyryn qaıta jańǵyrtý jobasynyń aıaqtalǵany (I kezeń) jáne Mańǵystaý oblysy Jańaózen qalasynyń qajettiligi úshin jańa sý tushytý zaýytynyń qurylysy bastalǵany jóninde baıandaldy.
Kezdesý sońynda Memleket basshysy ınvestısıalyq jobalardy júzege asyrý, kómirsýtegi eksportynyń baǵyttaryndaǵy turaqtylyqty qamtamasyz etý jáne geologıalyq barlaý jumystarynyń aýqymyn keńeıtý jóninde birqatar naqty tapsyrma berdi. Prezıdent ulttyq kompanıanyń munaı-gaz hımıasyn damytýǵa baǵyttalǵan jumysyna erekshe mán berý qajet ekenin aıtty.