Almaty Qalalyq kardıologıalyq ortalyǵyna júgingen 71 jastaǵy naýqas qatty entigý men búkil denesindegi álsizdikke shaǵymdandy. Tekserý júrgizilgennen keıin onyń qolqa qaqpaqshasynyń aıqyn stenozy anyqtaldy, dep habarlaıyd almaty-akshamy.kz
Qolqa stenozy - júrek qaqpaqshasynyń tarylýy, ol arqyly júrekten qan qolqaǵa enip, odan ári búkil denege taralady. Qolqa qaqpaqshasynyń stenozy kezinde organdar qannyń jetkiliksiz mólsherin alady. Mundaı dıagnoz qoıylǵannan keıin qysqa ýaqyt ishinde ólimge ákelýi múmkin qaýipti jaǵdaı. Aýrý emdelmese, pasıent mıokard ınfarktisi, mı ıshemıasy jáne ınsýlt sıaqty aýyr ári ómirge qaýip tóndiretin asqyný bolýy múmkin.
Naýqasqa shuǵyl ota jasaý qajet boldy. Oǵan keýde qýysyn kesýsiz femoraldy arterıadaǵy kishkene pýnksıa arqyly qolqa qaqpaǵy TAVI otasy barysynda aýystyryldy. Otanyń bul túri hırýrgıalyq aralasýdy kesýsiz jáne eń az ońaltý kezeńimen júrgizýge múmkindik beredi. Transkateterli qolqa klapanyn ımplantasıalaý (TAVI) - qolqa klapanyn aýystyratyn mınımaldy ınvazıvti prosedýra.
«Ota jergilikti aýyrsynýdy basý arqyly jasaldy, bul pasıenttiń ota kezinde esin bilip jatýǵa múmkindik berip, mıdyń kúıin baqylaýǵa jáne jedel serebrovaskýlárlyq buzylys túrindegi yqtımal asqynýdyń aldyn alýǵa múmkindik berdi. Tós súıeginiń kesilmeýi, jasandy qan aınalymy qajetsizdigi, mınımaldy jaraqat jáne tez qalpyna kelý - TAVI otasynyń negizgi artyqshylyǵy. Otadan 3 kún ótken soń naýqas aýrýhanadan úıge shyǵaryldy. Entigý tolyǵymen joıylyp, jalpy ál-aýqaty aıtarlyqtaı jaqsardy», - deıdi Qalalyq kardıologıalyq ortalyqtyń ıntervensıalyq kardıology Aıjan Qulanbaeva.
Mundaı TAVI otalar mańyzdy, óıtkeni ony densaýlyq jaǵdaıyna baılanysty ashyq júrek otasyn jasaı almaıtyn naýqastarǵa jasaýǵa bolady. Mundaı ota baýyr men búırek qyzmeti buzylǵan, sonymen qatar, júrek pen ókpeniń aýyr derti bar egde jastaǵy naýqastar úshin mańyzdy. Sebebi júrekke ashyq otany kóptegen egde jastaǵy adam qatar júretin aýrýlardyń bolýyna baılanysty shydaı almaıdy.