2020 jyly 213 eldiń ishinde tabıǵı gaz 144 memlekettiń turǵyndaryna qoljetimdi bolǵan.
Qazaqstanda kóshedegi gaz jelisiniń uzyndyǵy 34,8 myń shaqyrymdy qurady, bul ótken jylmen salystyrǵanda 6,6%-ǵa artyq, dep habarlaıdy Almaty-akshamy.kz Inbusiness.kz silteme jasap.
Bir jyl ishinde 2,3 myń shaqyrym jeli qosyldy. Qazirgi ýaqytta 74,1 shaqyrym jeli jóndeýdi qajet etedi.
2010 jyldan 2021 jylǵa deıin memlekettik búdjet esebinen 1,3 myńnan astam gazdandyrý jobasy iske asyryldy, óńirlerde 18 myń shaqyrymnan astam gaz taratý jelileri salyndy. Atap aıtqanda, 2019 jyldyń jeltoqsanynda uzyndyǵy 1,06 myń shaqyrym bolatyn "Qyzylorda-Astana" baǵyty boıynsha "Saryarqa" magıstraldyq gaz qubyrynyń qurylysy aıaqtalyp, birinshi kezeńi paıdalanýǵa berildi.
QR gaz salasyn damytýdyń 2022-2026 jyldarǵa arnalǵan keshendi josparynyń derekteri boıynsha, 2022 jylǵy 1 qańtarǵa el halqynyń gazdandyrý deńgeıi 53,1%-ǵa jetti, tabıǵı gazǵa 9,8 mln adam qol jetkizdi.
Gazdandyrý deńgeıiniń ósýin jáne jańa tutynýshylardyń qosylýyn eskere otyryp, 2010-2021 jyldary ishki naryqta gaz tutyný kólemi 106%-ǵa, ıaǵnı 9 mlrd-tan 18,6 mlrd tekshe metrge deıin ósti.
IndexMundi málimetterine sáıkes, 2020 jyly 213 eldiń ishinde tabıǵı gaz 144 memlekettiń turǵyndaryna qoljetimdi bolǵan. Olardyń ishinde Qazaqstan tutynylatyn gazdyń jalpy kólemi boıynsha 43-orynda (jylyna 15,4 mlrd tekshe metr) jáne jan basyna shaqqanda tutynylatyn gaz kólemi boıynsha 41-orynda (jylyna 805,1 tekshe metr) boldy. Elimizde jan basyna shaqqandaǵy gaz tutyný kólemi Armenıa, Moldova, Ýkraına, Qyrǵyzstan men Tájikstan sıaqty TMD elderiniń turǵyndarynan kóbirek.