Qazaqstan Sırıaǵa 50 tonna gýmanıtarlyq kómek jóneltti.
Bul týraly Syrtqy ister mınıstrliginiń resmı ókili Aıbek Smadıarov aıtty, dep habarlaıdy Almaty QazAqparatqa silteme jasap.
«Qazaqstan Respýblıkasy Prezıdenti Qasym-Jomart Toqaevtyń tapsyrmasy boıynsha Qazaqstan Úkimeti joıqyn jer silkinisinen zardap shekken Sırıa halqyna gýmanıtarlyq kómek kórsetedi. Kómek Azyq-túlik qaýipsizdigi jónindegi Islam uıymynyń jelisi boıynsha Islam yntymaqtastyǵy uıymy aıasynda beriletin bolady», - dedi resmı ókil.
Onyń atap ótýinshe, osy maqsatqa respýblıkalyq búdjetten 160 mln teńgeden astam soma bólinedi. Jalpy salmaǵy 50 tonna azyq-túlik, jyly kıim, shatyrlar men tósek-oryn jabdyqtary túrindegi kómek Qazaqstan Respýblıkasy arnaıy áýe kemelerimen Sırıa Arab Respýblıkasynyń aýmaǵyna jetkiziletin bolady. Búgin birinshi ushaq Almaty qalasynan Sırıaǵa ushyp shyqty.
«Azyq-túlik qaýipsizdigi jónindegi Islam uıymynyń basshylyǵy Qazaqstannyń Lıvandaǵy Elshiligi men Qazaqstannyń Sırıadaǵy konsýldyǵynyń kómegimen Aleppo qalasynda Sırıanyń ýákiletti ókilderine gýmanıtarlyq júkti tapsyrady. Azyq-túlik qaýipsizdigi jónindegi Islam uıymy – tolyqqandy halyqaralyq uıym mártebesimen ózindik halyqaralyq quqyq sýbektiligi bar, Islam yntymaqtastyǵy uıymynyń mamandandyrylǵan ınstıtýty. Ol Qazaqstan Respýblıkasynyń bastamasymen 2011 jyly qurylǵan, shtab-páteri Astanada ornalasqan», - dedi Aıbek Smadıarov.