«Qazaqstan» shahtasy aýmaǵynda bolǵan kenshi ólimine qatysty tergeý bastaldy.
Jumysshynyń máıiti transformatordyń janynan tabylǵan. 24 jastaǵy jigittiń naqty qandaı jaǵdaıda qaza bolǵany ázirge belgisiz, dep habarlaıdy Almaty-akshamy.kz.
Kompanıa bul týraly aqparat berýge asyǵar emes. Shahta basshylyǵy jumys kestesine sáıkes 6 qarasha – marqum kenshiniń demalys kúni bolǵanyn ǵana jarıa etti. Qazir jumbaq ólimniń mán-jaıy anyqtalyp jatyr. Polısıa tergeý jumystaryn bastap ketti.
Eske salaıyq, 3 qarashada Qaraǵandydaǵy Lenın atyndaǵy shahtada gaz jarylysy bolyp, 5 adam qaza tapqan edi. Taǵy 4 kenshi aýrýhanaǵa túsken.
«6 qarasha kúni Qazaqstan shahtasynyń ortasynda ornalasqan toq transformatynyń janynda 24 jastaǵy azamattyń máıiti tabyldy. Atalǵan derek polısıada tirkeldi. Qazirgi ýaqytta tıisti saraptamalar taǵaıyndaldy. Qortyndysy boıynsha naqty prosesýaldy sheshim qabyldanatyn bolady», - dedi Qaraǵandy oblystyq polısıa departamentiniń baspasóz hatshysy Baqytjan Qudıarov.