5 aı ishinde 140-tan astam jeńil hırýrgıalyq ota jasaldy.
6 qarashada Qazaqstannyń batys jáne ońtústik óńirleri boıynsha júretin «Járdem» medısınalyq poıyzy shalǵaıdaǵy stansıalardyń turǵyndaryna tegin medısınalyq kómek kórsetý úshin Almatyǵa keldi, dep habarlaıdy Almaty-akshamy.kz Almaty qalalyq Qoǵamdyq densaýlyq saqtaý basqarmasyna silteme jasap.
«Medısınalyq poıyz 79 shalǵaı stansıada jumys aıaldamalarymen 12 myń shaqyrymnan astam jol júrdi. 40 myńnan astam turǵyn tegin medısınalyq kómek aldy. Poıyz jumys istegen 5 aı ishinde 140-tan astam jeńil hırýrgıalyq ota jasaldy» - dedi Nazgúl Imanǵalıeva, qalalyq Qoǵamdyq densaýlyq saqtaý basqarmasy basshysynyń orynbasary.
Kómek suraǵandarǵa jalpy tájirıbelik dárigerler, terapevt, pedıatr, hırýrg, ýrolog, nevropatolog, oftalmolog, LOR, akýsher-gınekolog, stomatolog, psıholog, dermatovenerolog mamandar keńes berdi. 13 myńnan astam últradybystyq zertteýler jáne 9 myńǵa jýyq EKG tekserýleri júrgizildi.
Bul jobanyń basty maqsaty – elimizdiń shalǵaıdaǵy stansıalary men jaqyn ornalasqan aýyldarynyń sapaly medısınalyq kómekke qoly jetpeıtin turǵyndaryn tegin medısınalyq tekserýden ótkizý jáne dıagnostıkalaý.