Bul – óte qajetti, kerek joba.
Memleket basshysy Mańǵystaý oblysyna jumys sapary barysynda Aqtaý qalasyndaǵy «Kaspıı» sý tushytý zaýytynyń jumysymen tanysty, dep habarlaıdy Almaty-akshamy.kz Aqordanyń baspasóz qyzmetine silteme jasap.
Prezıdentke zaýytty keńeıtý jobasynyń oryndalý barysy týraly baıandaldy. Táýligine 20 myń tekshe metr taza sý óndiretin zaýyttyń qýatyn eki esege deıin arttyrý jumystary júrgizilip jatyr.
Oblys basshylyǵynyń aıtýynsha, qazirdiń ózinde Munaıly aýdanynyń eldi mekenderi men Qaraqıa aýdanyna qarasty Quryq aýylynda sý tapshylyǵy qatty sezilip otyr. Óńirde halyq sanynyń artýyna jáne týrısik klasterdiń damýyna baılanysty «Kaspıı» sý tushytý zaýytynyń ónimdiligin táýligine 40 myń tekshe metrge deıin arttyrý qajettigi týyndaǵan.
Qasym-Jomart Toqaev óńirdi aýyzsýmen qamtamasyz etetin kásiporynnyń mańyzy zor ekenin atap ótip, zaýytty jańǵyrtý jumysy sapaly oryndalatynyna senim bildirdi.
Bul – óte qajetti, kerek joba. Men búgingi jıynda naqty máselelerdi aıttym. Mundaı jobalarsyz qıyn bolady. Izraıl, Saýd Arabıasy, Sıngapýr sıaqty taza aýyzsýy joq elder kóp. Sondyqtan biz de mindetti túrde ozyq tehnologıalardy engizýimiz qajet. Úkimetke tapsyrma berildi. Kaspııdiń de deńgeıi túsip barady. Muny da oılanýymyz kerek, – dedi Prezıdent.
Budan keıin Memleket basshysy zaýyt jumysshylarymen áńgimelesip, olardyń halyq úshin paıdaly is atqaryp jatqanyn atap ótti.