Lázzat Tanysbaı "Qazaqstan" teleradıokorporasıasynyń Basqarma tóraǵa qyzmetinen ketti, - dep habarlaıdy aqshamnews.kz tilshisi.
"Birge qyzmet etken áriptesterime alǵys aıta otyryp, Basqarma tóraıymy retindegi qyzmetimdi aıaqtaýdy jón sanadym. Alty jyldan astam ýaqytta eń myqty, kásibı ujymmen birge jaýapty kezeńderdi eńserip, maqsat etip qoıǵan jobalardy júzege asyrdyq. Korporasıanyń qazirgi ýaqyttaǵy jetistikteri áriptesterimniń óz isine adaldyǵy men tynymsyz eńbeginiń jemisi. Osy kezeńde qyzmetkerlerdiń áleýmettik jaǵdaıyn jaqsartyp, kásibı damýyna qolaıly orta qalyptastyrýǵa tyrystym. Sebebi jaıly eńbek ortasy nátıjeli jumystyń, turaqtylyq pen tabystyń negizi dep esepteımin. Qazaq televızıasynyń qarashańyraǵy sanalatyn uıymda buǵan deıin talaı jetekshilerdiń ózine laıyq qoltańbasy qaldy. Bul sabaqtastyq jalǵasyn tabýy qajet. Ýaqytpen birge basshylardyń da almasyp, uıym jumysyna jańa tynys, jańa serpin berilip otyrýy kerek dep esepteımin.
Bul sheshimime qoldaý bildirgen sala mınıstrine alǵys aıtamyn. Men ári qaraı da otandyq televızıa salasynyń damýyna eńbek etemin", - dedi Lázzat Tanysbaı búgin Korporasıa jetekshilerimen ótken kezdesýinde.
Tanysbaı "Qazaqstan" respýblıkalyq teleradıokorporasıasyn 2019 jyldyń sáýirden beri basqaryp keldi. Korporasıa osy jyldar aralyǵynda aıtarlyqtaı jetistikterge jetti jáne bul kórsetkishter ujym úshin óte mańyzdy. Alty jyl ishinde Korporasıanyń tele jáne radıo arnalarynyń reıtıńi ósip, komersıalyq tabysy 50 paıyzǵa artty.
"Qazaqstan" arnasy osy kezeńde ulttyq mazmunyn saqtaı otyryp, qoǵamdyq-saıası formattaǵy baǵdarlamalarǵa basymdyq berdi. Bul baǵytta "Ashyq alań", "Bas taqyryp", "Qos palata", "Álem jáne biz" syndy jańa saraptamalyq jáne qoǵamdyq-saıası habarlar efırge shyǵyp, ashyq pikir alańdary qalyptasty.
Otandyq medıada alǵash ret jańa formattaǵy jobalar uıymdastyryla bastady. Olardyń qatarynda tikeleı efırde ótken, ınfoteınment úlgisindegi kópsaǵattyq onlaın marafondar bar.
Korporasıa osy jyldar ishinde tarıhı tulǵalarǵa arnalǵan telehıkaıalar túsirýge den qoıdy. Abaı Qunanbaıuly, Ahmet Baıtursynuly, Maǵjan Jumabaev, Mirjaqyp Dýlatuly, Álkeı Marǵulan, Qanysh Sátbaev, Dına Nurpeıisova, Ál-Farabı, Qorqyt jáne ózge de tarıhı tulǵalar men oqıǵalarǵa arnalǵan 22 serıal túsirildi. Solardyń biri "Mirjaqyp. Oıan, qazaq!" telehıkaıasy kórermenniń joǵary qyzyǵýshylyǵyna ıe bolyp, óz aldyna mádenı fenomenge aınaldy. Sonymen qatar qazaq qalamgerleri Saıyn Muratbekovtiń, Berdibek Soqpaqbaevtyń, Ázilhan Nurshaıyqovtyń "Jabaıy alma", "On alty jasar chempıon", "Mahabbat, qyzyq mol jyldar" ádebı týyndylary ekranızasıalandy, Qusnı-Qorlan ániniń shyǵý tarıhy baıandalatyn "Estaı men Qorlan" telehıkaıasy túsirildi.
Korporasıa óndirgen anımasıalyq fılmder kınoprokatqa shyǵa bastady. "Balapan" telearnasynyń 15 jyldyǵyna oraı "Shoqan. Qashqarıaǵa sapar", "Jelaıaq", "Toqty men Serke" anımasıalyq týyndylary úlken ekrandarǵa shyqty.
Osy jyldar ishinde qoǵamdaǵy ózekti taqyryptardy qamtyǵan 300-ge jýyq derekti fılm túsirildi. Olardyń arasynda memleket tarıhyndaǵy alǵashqy dáriger, muǵalim áıelder Aqqaǵaz Dosjanova, Gúlsim Asfendıarova, Názıpa Quljanova, Husnı-Jamal Nurlyhanovanyń taǵdyryna arnalǵan "Qazaq qyzy", ár dáýirdiń uly tulǵalaryna qatysty "Dáýir danalary", túrli salada aıtýly eńbegimen tanylǵan qazaqstandyqtarǵa arnalǵan "Biregeı" derekti fılmder toptamasy bar
2020 jyly Lázzat Tanysbaıdyń jetekshiligimen Korporasıa quramynda mádenı-aǵartý baǵytyndaǵy "Abai TV" telearnasy iske qosyldy. Pandemıa kezinde shaǵyn qurammen jumysyn bastaǵan arna búginde táýligine 17 saǵat habar taratyp, otandyq jáne álemdik óner men mádenıettiń túrli salalaryna arnalǵan telejobalar óndirip jatyr.
Otandyq kontentti halyqaralyq aýdıtorıaǵa jetkizý jumystary da qarqyn aldy. 2023 jyldan bastap "Qazaqstan" jáne "Balapan" telearnalary Ózbekstan, Qyrǵyzstan, Mońǵolıa memleketteriniń aýmaǵyna taratyla bastady.
Dıdjıtal baǵytynda birneshe iri joba júzege asyryldy: altynqor.com saıty, "Birge.tv" strımıngtik platformasy men túrli taqyryptyq baǵyttar boıynsha 10 veb-telearna iske qosyldy. "Altyn qordaǵy" 1500 án-kúı men fólklorlyq aýdıoshyǵarmalar 100-den astam álemdik mýzykalyq platformalarǵa júktelip, jınaq retinde jaryqqa shyqty. Jasandy ıntellekt kómegimen qazaq ertegileri negizinde anımasıalyq fılmder shyǵaryla bastady.
Sporttyq translásıalardy taratýshy negizgi medıauıym retinde Korporasıa komentatorlar men sport jýrnalıserine arnalǵan "Komentator sózdigin", jýrnalıserge arnalǵan kásibı etıka standarttarynan turatyn "Redaksıa standarty" nusqaýlyǵyn shyǵardy.
Lázzat Tanysbaıdyń bastamasymen Korporasıa janynan bolashaq televızıa mamandaryna arnalǵan Medıamektep iske qosylyp, tórt jyl ishinde 123 stýdent tegin bilim alyp shyqty. Onyń ishinde 24 stýdent Korporasıaǵa jumysqa qabyldandy.
Ujym úshin mańyzdy kórsetkishterdiń biri - osy jyldar ishinde Korporasıada jetekshilik qyzmetterge taǵaıyndaý merıtokratıalyq tásilmen júzege asyryldy. Ujymda uzaq jyldardan beri qyzmet etip júrgen jáne nátıjeli eńbegimen erekshelengen 100-den astam qyzmetker jetekshilik laýazymdarǵa taǵaıyndaldy.
Lázzat Tanysbaı jańa qyzmetke taǵaıyndaldy
Lázzat Tanysbaı búginnen bastap "Evrazıa" Birinshi arnasyna" jetekshilik etedi.
"Evrazıa" Birinshi arnasy" 1997 jyldan beri jumys istep kele jatqan respýblıkalyq telearna. Kvazımemlekettik medıauıym búkil Qazaqstan aýmaǵynda qazaq jáne orys tilderinde habar taratady. Kórermender aýqymy boıynsha otandyq telearnalar arasynda alǵashqy úshtikke kiredi.
Lázzat Muratqyzy Tanysbaıǵa "Qazaqstan" teleradıokorporasıasyn damytý jolyndaǵy qajyrly qyzmeti men ujym ishinde adaldyq, ádildik prınsıpterin qalyptastyrýǵa sińirgen eńbegi úshin ujym atynan shynaıy alǵysymyzdy bildirip, jańa qyzmetine tabys pen jetistikter tileımiz.