2025 jylǵy 20 aqpan men 2 naýryz aralyǵynda Almaty qalasynda ornalasqan ADD Arena sport kesheninde (Nurkent shaǵyn aýdany, 14B) Qazaqstan Respýblıkasynyń jasóspirimder men jastar arasyndaǵy U17 jáne U20 sanatyndaǵy grek-rım, erkin jáne áıelder kúresi boıynsha chempıonat ótedi, dep habarlaıdy aqshamnews.kz
Atalǵan birinshilikke elimizdiń 17 oblysynan, sondaı-aq Astana, Almaty jáne Shymkent qalalarynan eń úzdik jas balýandar qatysady. Olar Qazaqstan chempıony ataǵy úshin jáne bıylǵy kúntizbelik jylǵa josparlanǵan halyqaralyq jarystarda – Azıa jáne álem chempıonattarynda ulttyq qurama sapynda el namysyn qorǵaý múmkindigi úshin kúresedi.
20 aqpanda saǵat 16:30-da U17 jáne U20 jas sanattaryndaǵy grek-rım, erkin jáne áıelder kúresi boıynsha Qazaqstan Respýblıkasynyń chempıonatynyń saltanatty ashylý rásimi ótedi. Bul sharaǵa elimizdiń dańqty balýandary – Olımpıada oıyndarynyń júldegerleri, álem jáne Azıa chempıondary qatysyp, kúres sportynyń úsh stıliniń damýyna qosqan úlesterin atap ótedi.
Týrnırdiń mańyzdylyǵy jaıly Almaty qalasynyń kúres federasıasynyń prezıdenti Omar Alıev:
"Qazaqstan Respýblıkasynyń grek-rım, erkin jáne áıelder kúresi federasıasynyń basshylyǵyna osyndaı aýqymdy jarysty ótkizýge senim bildirip, Almatyda uıymdastyrý múmkindigin bergeni úshin alǵysymdy bildiremin. Bul jarys – elimizdegi resmı jarystar kúntizbesiniń ashylýy ispettes. Sonymen qatar, Almaty qalasynyń Sport basqarmasyna týrnırdi uıymdastyrýdaǵy qoldaýy úshin erekshe alǵys aıtqym keledi. Almatyda kúres sportyn damytýda oń ózgerister boldy, bul chempıonat jas balýandarymyzǵa óz sheberlikterin joǵary deńgeıde kórsetýge tamasha múmkindik beredi."