Ál-Farabı atyndaǵy QazUÝ-ǵa Túrkıanyń eks Premer-mınıstri, Túrkıanyń memleket jáne saıası qaıratkeri Bınáli Iyldyrym is-saparmen kelip, ýnıversıtet basshylyǵymen kezdesip, stýdentterge kóshbasshylyq dáris oqydy.
Jıynda Ál-Farabı atyndaǵy QazUÝ-dyń Basqarma Tóraǵasy-Rektory Janseıit Túımebaev óz sózinde Túrkıanyń eks Premer-mınıstri, Túrkıa Respýblıkasynyń memlekettik Qurmet medaliniń ıegeri, Túrki memleketteri Uıymynyń aqsaqaldar keńesiniń múshesi, saıasatqa, ekonomıkaǵa jáne bilim berýdi damytýǵa eleýli yqpal etken kórnekti qaıratkerdiń eleýli eńbekterin atap ótti.
QazUÝ búginde Túrkıanyń 46 joǵary oqý orny jáne uıymdarymen, sonyń ishinde Stambýl ýnıversıteti, Aqdenız bilim ordasy, Ankara áleýmettik ǵylymdar ýnıversıteti, Ystambul tehnıkalyq ýnıversıteti sıaqty bedeldi oqý oryndarymen tyǵyz qarym-qatynas jasaı otyryp, halyqaralyq yntymaqtastyqty belsendi damytýda.
«Biz Qazaqstan Prezıdentiniń 2022 jylǵy 11 mamyrdaǵy resmı sapary aıasynda QazUÝ-dyń Ystambuldaǵy fılıalynyń ashylýyn erekshe maqtan tutamyz. Bul joǵary bilim berý baǵdarlamalaryn belsendi damytýǵa, ǵylym men bilimniń halyqaralyq bilim berý keńistigine ıntegrasıalanýyna yqpal etedi. Baýyrlas elder arasyndaǵy qarym-qatynastardy jandandyrýǵa jáne bilim berý men ǵylymı baılanystardy nyǵaıtýǵa qosqan úlesterińiz biz úshin asa mańyzdy. Sizdiń bilimińiz ben tájirıbeńiz stýdentter men ǵalymdardy shabyttandyrady, sonymen qatar óz halqy men qoǵamǵa qyzmet etýdiń úlgisi bolyp tabylady», –dedi Janseıit Qanseıituly.
Bınáli Iyldyrym kóshbasshylyq dáriste Qazaqstan men Túrkıanyń ekonomıka, saýda, bilim berý, ónerkásip salalaryndaǵy tyǵyz dostyq qarym-qatynastardyń qalyptasqany jaıly aıtty. «Biz túrki memleketteri uıymdary aıasynda saýda-ekonomıkalyq baılanystardy damytýdyń zor áleýetin kórip otyrmyz. Mysal retinde túrki memleketteriniń syrtqy saýda qatynastaryn keltirýge bolady. Bul ekonomıkalyq yntymaqtastyqty damytýdy qanshalyqty yntalandyratynyn kórsetedi. Biraq ekonomıka – bul kórinistiń bir bóligi ǵana. Baılanystardy shynaıy nyǵaıtý úshin biz bir-birimizdi jaqsy tanýymyz kerek. Bul degenimiz biz ortaq qundylyqtarymyzdy, eń aldymen tildi, ǵylymdy jáne bilim berýdi damytýymyz kerek» – dep atap ótti Bınáli Iyldyrym.
Dáristen sońy ózara pikir alamasýǵa ulasyp, qatysýshylar men stýdentter ózderin qyzyqtyrǵan suraqtarǵa jaýap aldy.
