Bıyl barsha qazaq eli úshin aıryqsha tarıhı jyl – Qazaqstan Respýblıkasy Konstıtýsıasynyń qabyldanǵanyna 30 jyl toldy. Bul – tek ýaqyttyń ólshemi ǵana emes, táýelsiz memleketimizdiń qalyptasý jolyndaǵy eń qasıetti belesterdiń biri.
Ár halyqtyń tarıhynda eldiń taǵdyryn sheshetin, bolashaq baǵytyn aıqyndaǵan kezeńder bolady. Ol – ótken ǵasyrdyń toqsanynshy jyldary edi. Keńes Odaǵy ydyrap, san ǵasyr boıy armandaǵan táýelsizdikke qol jetkizgen shaqta halqymyzdyń aldynda jańa suraq turdy: «Biz memleketimizdi qandaı zańmen, qandaı tártippen, qandaı negizben basqaramyz?» Mine, osy saýalǵa berilgen aıqyn ári sheshýshi jaýap – 1995 jyly qabyldanǵan Ata Zańymyz boldy.
Konstıtýsıa – jaı ǵana quqyqtyq qujat emes, ol – halyq júreginiń úni, eldiń taǵdyryn túgendegen tegeýrindi zań. Halqymyz ony bekerden-beker «Ata Zań» dep atamaǵan. Óıtkeni onyń árbir baby – halyqtyń quqyǵyn qorǵap, bolashaqqa jol silteıtin shamshyraq. Otyz jyl boıy Konstıtýsıamyz Qazaqstandy tatýlyqtyń týy, turaqtylyqtyń tiregi, ádilettiń aınasy etip keledi. «Ádil zań – eldiń aıbyny» dep ata-babamyz aıtqandaı, Ata Zańymyz el ishindegi tynyshtyqty, ár azamattyń teńdigin qamtamasyz etti. Búginde Qazaqstandy álem beıbitshiliktiń besigi, turaqtylyqtyń mekeni retinde tanıdy. Bul – Konstıtýsıada bekigen demokratıalyq qundylyqtardyń jemisi.
Halqymyz ejelden-aq ádildik pen zańǵa súıenip, «Qasym hannyń qasqa joly», «Esim hannyń eski joly», Táýke hannyń «Jeti jarǵysy» – barlyǵy da halqymyzdyń ómirin tártipke keltirgen dala zańdary boldy.
Búgingi Konstıtýsıa – sol dástúrdiń zańdy jalǵasy, jańa dáýirdegi jalǵamy. Babalarymyz: «Han ádil bolsa – halyq yrysty, Zań ádil bolsa – el tynyshty» – dep tegin aıtpaǵan. Ata Zańymyzdyń ádildigi men kemeldigi arqasynda árbir qazaqstandyq óziniń quqyǵyn qorǵap, arman-maqsatyn júzege asyra alady. Eń bastysy – beıbit aspan astynda ómir súredi.
Otyz jyl – tarıh ólshemimen qysqa ǵana ýaqyt, biraq biz úshin bul jyldarda ǵasyrǵa tatıtyn ister atqaryldy. Memleketimizdiń árbir jetistiginiń artynda Konstıtýsıanyń qaǵıdalary tur. Ár azamattyń erkin bilim alýyna, eńbek etýine, óz pikirin ashyq aıtýyna quqyq berildi. Bul – damyǵan elderge tán qundylyqtar.
Konstıtýsıa – qutty qazyq, máńgilik baǵyt, ar-namysymyzdyń aınasy. Álemde túrli qaqtyǵystar, daý-janjaldar oryn alyp jatqanda, bizdiń elde tatýlyq pen birliktiń saltanat qurýy – Ata Zańymyzdyń artyqshylyǵy. Otyz jyldyq mereıtoı – ótkenge taǵzym etip, bolashaqqa senimmen qaraýdyń sáti. Endigi mindet – osy asyl murany qasterlep, árbir babyn qurmettep, urpaqtan-urpaqqa jalǵaý.
Elimizdiń urany aıqyn: Ata Zań – barshaǵa ortaq asyl mura. Onyń qadirin bilip ardaqtaý – bizge paryz!
Konstıtýsıamyz – eldiktiń eńsesi, birliktiń baıraǵy, táýelsizdiktiń tiregi bolyp jasaı bersin, halqymyzdyń mereıi árqashan ústem bolsyn!