Qazir kórshi elmen kógildir otynnyń baǵasy kelisilip jatyr.
Kórshi elden Qytaıǵa Qazaqstan aýmaǵy arqyly jylyna shamamen 35 mlrd tekshe metr gaz tasymaldanbaq, dep habarlaıdy Almaty-akshamy.kz
Qazaqstan ishki naryqty qamtamasyz etý úshin Reseıden gaz satyp alady. Bul týraly Qazaqstannyń Reseıdegi elshisi Dáýren Abaev TASS agenttigine málimdedi.
Ol byltyr kúzden beri Reseıdiń gazy Qazaqstan aýmaǵy arqyly Ózbekstanǵa tasymaldanyp jatqanyn eske saldy.
"Biz shynymen de gazǵa muqtajbyz. Qazaqstan óz aýmaǵyn tranzıt úshin paıdalanady. Biz tranzıttik áleýetimizden barynsha paıda kórgimiz keledi. Jol kartasyna qol qoıyldy. Qytaıǵa jetkiziletin 35 mlrd tekshe metr gaz týraly sóz bolyp otyr. Bul Qazaqstannyń shyǵys jáne soltústik-shyǵys óńirlerin gazdandyrýǵa múmkindik beredi. Sol sebepti biz álgi ýaǵdalastyqtardyń bárin quptaımyz jáne jobalardyń júzege asqanyna qýanamyz», - dedi Abaev.