Bul - COVID-19 pandemıasymen kúrestegi yntymaqtastyq sheńberinde júzege asqan shara.
Qazaqstannan Qyrǵyzstanǵa «QazVac» ınaktıvtendirilgen vaksınasynyń 25 000 doza kólemindegi izgilik kómek jetkizildi, dep habarlaıdy Almaty-akshamy.kz QR Syrtqy ister mınıstrliginiń baspasóz qyzmetine silteme jasap.
Ony Bishkekte tapsyrý rásimi Qyrǵyzstan Densaýlyq saqtaý mınıstri Alymkadyr Beıshenalıev, Qazaqstan Elshisi Rápil Joshybaev pen medısınalyq uıymdar ókilderiniń qatysýymen ótti.
Mınıstr Alymkadyr Beıshenalıev elde koronavırýstyq ınfeksıanyń odan ári taralýyna qarsy is-qımylda mańyzdy qoldaý kórsetkeni úshin Qazaqstan tarapyna shynaıy rızashylyǵyn bildirdi.
«Biz respýblıka turǵyndarynyń Astra Zeneca, Sputnik V jáne basqa da sheteldik vaksınalarmen qatar QazVac-pen de ekpe alatynyna qýanyshtymyz», - dep atap ótti ol osy oraıda.
Onyń aıtýynsha, qazaqstandyq vaksına halyqty vaksınalaý pýnktterine jedel taratylady jáne azamattardyń koronavırýsty juqtyrý qaýpin azaıtý boıynsha respýblıkanyń medısınalyq júıesiniń múmkindikterin nyǵaıtady.
Óz kezeginde Rápil Joshybaev vaksınany jetkizýdi Qazaqstan Prezıdenti Qasym-Jomart Toqaevtyń Qyrǵyzstan Prezıdenti Sadyr Japarovpen kelissózderiniń nátıjeleri boıynsha bergen tapsyrmasyna sáıkes Qazaqstan Úkimeti uıymdastyrǵanyn atap ótti.
«Qyrǵyzstan bizdiń dostarymyz ben halyqaralyq seriktesterimizdiń arasynda birinshi bolyp koronavırýsqa qarsy qazaqstandyq vaksına alady, bul elderimiz arasyndaǵy dostyq pen tatý kórshilestik qatynastaryn taǵy da rastaıdy», – dep atap ótti Elshi.
Ol sondaı-aq Qazaqstannyń izgilik kómegi kóptegen adamdardyń ómirin qutqarýǵa jáne Qyrǵyzstandaǵy sanıtarlyq-epıdemıologıalyq jaǵdaıdy jaqsartýǵa kómektesetinine senim bildirdi.
«QazVac»-ty Qazaqstannyń Bilim jáne ǵylym mınıstrliginiń Bıologıalyq qaýipsizdik problemalarynyń ǵylymı-zertteý ınstıtýty óndirip shyǵarǵan jáne 2021 jyldyń basynan beri ol reseılik jáne qytaılyq mamandar ázirlegen preparattarmen qatar qazaqstandyqtardy vaksınalaý úshin keńinen qoldanylady. Qazaqstanda klınıkalyq synaqtar men ony keńinen qoldaný tájirıbesi «QazVac» vaksınasynyń qaýipsizdigin jáne onyń koronavırýstyq ınfeksıa men onyń aýyr túrlerin juqtyrýdyń aldyn alýda joǵary tıimdiligin (90%-dan astam) kórsetti.
«QazVac»-pen vaksınalaý 18 jastan asqan adamdarǵa usynylady jáne bulshyqet ishine eki kezeńde júrgiziledi, olardyń arasyndaǵy usynylatyn aralyq 21 kúndi quraıdy. Budan buryn habarlanǵandaı, salalyq organdar otandyq vaksınaǵa kelisim alý úshin Dúnıejúzilik densaýlyq saqtaý uıymymen jumys júrgizip jatyr.