Mınıstrler birlesken komúnıke qabyldady jáne eki jyl merzimge kezekti yntymaqtastyq josparyn bekitti.
Tájikstan astanasy Dýshanbe qalasynda Shanhaı yntymaqtastyq uıymyna múshe memleketter qorǵanys mınıstrleriniń keńesi bolyp ótti, dep habarlaıdy Almaty-akshamy.kz.
İs-sharaǵa qorǵanys vedomstvolarynyń basshylary: Úndistannan – Radjnath Sıngh, Qazaqstannan – general-leıtenant Nurlan Ermekbaev, Qytaıdan – general-polkovnık Veı Fenhe, Qyrǵyzstannan – general-maıor Taalaıbek Omýralıev, Pákistannan – Pervez Hattak, Reseıden – armıa generaly Sergeı Shoıgý, Tájikstannan – general-polkovnık Sheralı Mırzo jáne Ózbekstannan – general-leıtenant Bahodır Kýrbanov qatysty.
Resmı málimetterge júginsek, keńeske qatysýshylar dostyq jáne syndarly ózara is-qımyl jaǵdaıynda SHYU-ǵa múshe memleketter arasyndaǵy ózara túsinistiktiń joǵary deńgeıin atap óte otyryp, halyqaralyq jáne óńirlik qaýipsizdiktiń ózekti máseleleri tóńireginde pikir almasty. Aýǵanstan aýmaǵynda oryn alyp jatqan táýekelder men qaýip-qaterlerdi beıtaraptandyrý boıynsha baǵyttar men yqtımal áreketterdi talqylady.
«Shanhaı yntymaqtastyq uıymynyń óńirdegi jáne álemdegi mańyzy artty. Óńirlik, sondaı-aq halyqaralyq uıymdarmen jáne birlestiktermen yntymaqtastyq is júzinde nyǵaıýda», – dedi Qazaqstannyń Qorǵanys mınıstri, general-leıtenant Nurlan Ermekbaev.
Keńeske qatysýshylar SHYU-nyń óńirlik seriktes uıymdarmen is júzindegi ózara is-qımyldy óristetý kerektigin aıtty.
«Sonymen birge, SHYU-ǵa múshe memleketter qorǵanys vedomstvolarynyń basshylary bıylǵy jylǵy qyrkúıekte Reseı Federasıasynda «Beıbit mısıa – 2021» birlesken terorızmge qarsy áskerı komandalyq-shtabtyq oqý-jattyǵýlaryn ótkizýdi talqylady», – delingen Qorǵanys mınıstrligi baspasóz qyzmetiniń habarlamasynda.
İs-shara barysynda SHYU keńistiginde qaýipsizdikti nyǵaıtýǵa jáne turaqtylyqty qoldaýǵa baǵyttalǵan yntymaqtastyqty jalǵastyrý, sondaı-aq 2022 jyly kezekti otyrysty Ózbekstanda ótkizý týraly ýaǵdalastyqtarǵa qol jetkizildi. Shanhaı yntymaqtastyq uıymyna múshe elderdiń qorǵanys mınıstrleri keńestiń qorytyndysy boıynsha hattamaǵa qol qoıyp, birlesken komúnıke qabyldady jáne eki jyl merzimge kezekti yntymaqtastyq josparyn bekitti.