Qazaqstan qylmystyq quqyqtyq salada 34 memleketpen 72 ekijaqty kelisimge qol qoıǵan.
Senattyń jalpy otyrysynda «Qazaqstan men Fransıa arasyndaǵy qylmystyq ister boıynsha ózara quqyqtyq kómek týraly shartty ratıfıkasıalaý týraly» zań maquldandy, dep habarlaıdy Almaty-akshamy.kz
Bas prokýrordyń orynbasary Áset Shyndalıevtiń aıtýynsha, búginde Qazaqstan qylmystyq quqyqtyq salada 34 memleketpen 72 ekijaqty kelisimdi bekitken. Onyń ishinde Eýropadaǵy 16 elmen 35 shart jasasqan. Olardyń arasynda Ulybrıtanıa, Ispanıa, Italıa, Monako, Vengrıa jáne taǵy basqa memleketter bar.
«Qylmystyq ister boıynsha quqyqtyq kómek kórsetý týraly 29 shartqa qol qoıyldy. Jasyryn júrgen adamdy ustap berý týraly 21 shart bekitildi. Sottalǵan adamdardy berý týraly kelisim 22 elmen jasaldy. Osyndaı halyqaralyq sharttardy jasaýda biz týrısik ekonomıkalyq qarym-qatynas damyǵan elderge basymdyq beremiz», - dedi Áset Shyndalıev.
Qazaqstan men Fransıa qylmystyq isti birigip tergeýge múmkindik beretin kelisimge toqtaldy.
Mundaı sharttar taraptarǵa birqatar quqyqtyq mindetti júkteıdi. Shart kúshine engen soń taraptar bir-birine joldaǵan quqyqtyq kómek týraly suraýlardy oryndaýǵa mindetti bolady. Oryndaýdan bas tartsa, onda jazbasha túrde naqty jaýap berýge tıis. Sondaı-aq isti tergeýge baılanysty bir elden ekinshi elge shaqyrylǵan kýágerler men sarapshylarǵa shaqyrǵan tarap qylmystyq qýdalaýdan ımýnıtet beredi, - dedi bas prokýrordyń orynbasary.
Áset Shyndalıev kelisimniń negizgi talabyna toqtaldy.
«Usynyp otyrǵan shart ózara quqyqtyq kómek kórsetý negizderi men tártibin, olardy júzege asyrý joldaryn, kýáger men sarapshy, aıyptalýshyny shaqyrtý, olardan jaýap alý, kúzetpen ustalyp otyrǵan adamdy ýaqytsha aldyrý jáne taǵy basqa máselelerdi retteıdi. Naqty aıtqanda suraý salý, zattardy tárkileý, tintý, saraptama júrgizý, bankterdegi shottardy anyqtaý, kýáger jáne sarapshy, aıyptalýshydan jaýap alý, aqparat almasý jáne taǵy basqa tergeý amaldaryn qamtıdy. Mysaly, Fransıada tintý júrgizý qajet bolǵanda Qazaqstannyń quqyq qorǵaý organdary suraý joldaıdy. Oǵan tergeý soty sanksıa men qaýlyny qosa beredi. Fransıa tergeý organy óziniń ulttyq zańnamasy negizinde tintý jasaıdy. Onyń nátıjesin bizge habarlaıdy. Dál osyndaı tártippen Fransıadan túsken suraýlardy Qazaqstannyń tergeý organdary oryndaıdy. Onyń ishinde Fransıa sotymen sanksıalanǵan qaýlyny bizdiń tergeý soty rastaıdy. Al tergeý áreketterin Qazaqstan zańyna sáıkes bizdiń tergeý organdary júrgizedi. Mundaı sharttar tergeýdiń tolyqtyǵyn qamtamasyz etýge múmkindik beredi, - dedi ol.
Daýys berý nátıjesinde zań jobasy maquldandy.
Búginde Qazaqstannyń Fransıadaǵy elshiliginde jáne Strasbýrgtegi bas konsýldyqta Qazaqstannyń 629 azamaty esepte tur. Onyń 149-y Fransıada turaqty turýǵa qujattaryn rásimdegen.
Sondaı-aq Qazaqstanda 532 Fransıa azamaty bar: 84-niń turýǵa yqtıarhaty bolsa, 448-i ýaqytsha esepte tur.