Konsýldyq jumysynyń basym baǵyty – Qazaqstan azamattarynyń quqyqtary men zańdy múddelerin qorǵaý.
Qazaqstannyń Ispanıadaǵy elshisi Danat Musaevtyń Kanar araldary avtonomıalyq qaýymdastyǵyna jumys sapary barysynda qurmetti konsýldyqtyń saltanatty ashylý rásimi ótti, dep habarlaıdy Almaty-akshamy.kz Qazaqstannyń syrtqy ister mınıstrligine silteme jasap.
Sapar basynda qazaqstandyq dıplomat Kanar araldary úkimetiniń tóraǵasy Fernando Klavıhomen jáne Ispanıa úkimetiniń Kanar araldaryndaǵy ókili Marıa Tereza Maıanspen kelissózder júrgizdi.
Kezdesý barysynda óńirlik yntymaqtastyqtyń ózekti máseleleri talqylandy.
Sondaı-aq sapar barysynda Qazaqstan elshisi saýda-ónerkásip palatasymen birlesip uıymdastyrylǵan "dóńgelek ústelge" qatysty. İs-shara aıasynda elshi isker toptar ókilderiniń nazaryn eki eldiń óńirleri arasyndaǵy ekonomıkalyq ózara is-qımyldy damytýdyń basymdyǵyna, sondaı-aq Eýropa men Azıa arasyndaǵy júkterdi tasymaldaý úshin elimizdiń tranzıttik áleýetin paıdalanýǵa aýdardy.
Sapardyń basty is-sharasy Kanar araldarynda QR qurmetti konsýldyǵynyń saltanatty ashylý rásimi boldy. Qazaqstannyń óńirdegi ókildigin Atlantıka dırektıvalyq ınstıtýtynyń halyqaralyq saýda jáne halyqaralyq ekonomıka profesory Rafael Hýan Molına Petıt basqardy. Ol buryn Kanar araldarynyń ekonomıka mınıstrligi men ónerkásip, saýda jáne týrızm mınıstrliginde basshy laýazymdarynda qyzmet atqarǵan.
Qurmetti konsýlǵa, eń aldymen, óńir men Qazaqstan arasyndaǵy ekonomıkalyq jáne mádenı-gýmanıtarlyq baılanystardy nyǵaıtýda mańyzdy ról beriledi. Bul rette Ispanıa azamattary asyrap alǵan qazaqstandyq balalarmen baılanysty qoldaýǵa erekshe nazar aýdarylady.