2024 jyldyń 27 qyrkúıeginde Qazaqstannyń Qorǵanys mınıstrligi merzimdi áskerı qyzmetti joıý týraly másele boıynsha málimdeme jasady.
Mınıstrlik ókilderiniń aıtýynsha, QR Konstıtýsıasynyń 36-babyna sáıkes, "Qazaqstan Respýblıkasyn qorǵaý – árbir azamattyń qasıetti paryzy jáne mindeti". Qorǵanys mınıstrligi merzimdi áskerı qyzmetti joıý memlekettiń jalpy qaýipsizdigine qater tóndirip, syrtqy qaýip-qaterlerge qarsy turý múmkindigin tómendetip, elimizde beıbitshilik pen turaqtylyqty qamtamasyz ete almaıdy dep eskertedi, dep habarlaıdy aqshamnews.kz.
Ákimshilik prosestik-prosedýralyq kodekstiń 90-1-babyna sáıkes, petısıalardyń taqyrybyna qorǵanys máseleleri engizilmeıdi. Bul bastama memlekettiń qorǵanys qabiletine nuqsan keltirýi múmkin ekenin atap ótti.
Qorǵanys mınıstrliginiń málimdemesine sáıkes, Qazaqstanda basymdyq kelisimshart negizindegi qyzmetke berilip, 70%-dyq úles solarǵa, al 30%-dyq úles merzimdi qyzmetke bólinedi.
"Elimizdiń jaýyngerlik áleýeti negizinen kelisimshart negizinde qyzmet etetin áskerı qyzmetkerler arqyly qamtamasyz etiledi. Degenmen, qalǵan 30%-dy merzimdi qyzmettegi sarbazdar quraıdy. Merzimdi qyzmettegi sarbazdar óz qyzmet kezeńinde áskerı daıyndyqtyń negizgi daǵdylaryn meńgerip, jaýyngerlik jaǵdaıda áreket etýdi, atý, áskerı tehnıkany júrgizýdi úırenedi, sondaı-aq fızıkalyq jáne moraldyq jaǵynan shyńdalady. Qyzmetin aıaqtaǵannan keıin olar áskerı daıyndyqtan ótken rezerv retinde esepte turady jáne merzimdi túrde qaıta daıarlaý kýrstarynan ótip, biliktiligin arttyryp otyrady", – delingen Qorǵanys mınıstrliginiń baspasóz habarlamasynda.