2024 jylǵy 1 qazannan bastap kolektorlar qaryzdy óndirip alý kezinde qaryz alýshymen kelisimge kelý tártibin ustanýy tıis, dep habarlaıdy aqshamnews.kz.
Jańa erejelerge sáıkes, kolektorlar qaryz alýshyǵa onyń mindettemelerdi oryndaý sharttaryn ózgertýge ótinish berý quqyǵy týraly habarlaýy kerek:
2024 jylǵy 1 qazanǵa deıin satyp alynǵan qaryzdar boıynsha – 20 kún ishinde;
2026 jylǵy 1 mamyrdan keıingi jańa qaryzdar boıynsha – 30 kún ishinde banktik qaryz nemese mıkrokredıt sharty boıynsha quqyqtar alynǵan sátten bastap habarlanýy tıis.
Sonymen qatar, qaryz alýshylardyń quqyqtary keńeıtildi. Endi qaryz alýshylar kolektorlyq agenttikke kez kelgen ýaqytta qaryzdy retteý boıynsha óz usynystaryn engize alady. Bul usynystar kelesi sharttardy qamtýy múmkin:
Negizgi qaryzdy nemese syıaqyny tóleýdi keıinge qaldyrý nemese bólip tóleý;
Qaryzdy óteý kezektiligin ózgertý, sonyń ishinde negizgi qaryzdy basym túrde óteý;
Qaryz merzimin ózgertý;
Aıyppuldar men ósimpuldardy qysqartý nemese tolyǵymen joıý;
Banktik qaryzdy óteýge qatysty komısıalardy azaıtý nemese alyp tastaý;
Negizgi qaryz jáne/nemese syıaqy boıynsha tolyq nemese ishinara keshirý;
Jyljymaıtyn múlikti óz betinshe satý arqyly qaryzdy óteý;
Qamtamasyz etilgen múlikti kolektorlyq agenttikke berý arqyly mindettemeni óteý.
Qaryz alýshynyń ótinishinde mindettemelerdi oryndamaý sebepteri kórsetilýi tıis jáne kiristerdiń azaıǵanyn nemese mindettemelerdi oryndaý múmkin emestigin rastaıtyn qujattar qosa beriledi.
Óz kezeginde, kolektorlar ótinishke 15 kún ishinde jaýap berýge mindetti. Olar qaryz alýshynyń usynystarymen kelisýi, qarsy usynys jasaýy nemese dáleldi túrde bas tartýy múmkin.
Kolektorlyq agenttik sheshim qabyldaǵan kezde ishki qujattarǵa súıenedi, onda qaryz alýshylardyń kategorıalary (mysaly, resmı jumyssyzdar nemese áleýmettik osal toptar) jáne qajetti qujattar tizimi men qaryz júktemesin azaıtý sharalary kórsetilýi kerek.
Bul aqparat kolektorlyq agenttiktiń resmı saıtynda ornalastyrylýy qajet.
«Nesıe berý kezinde táýekelderdi azaıtý, qaryz alýshylardyń quqyqtaryn qorǵaý, qarjy naryǵyn jáne oryndaý óndirisin retteýdi jetildirý týraly keıbir zańnamalyq aktilerge ózgerister men tolyqtyrýlar engizý týraly» zańǵa memleket basshysy 2024 jylǵy 19 maýsymda qol qoıǵanymen, ol birtindep kúshine enedi.