Qazaqstan Qarýly kúshteriniń komandasy Arızona shtatyndaǵy Kemp Navaho áskerı bazasynda jyl saıyn ótetin Best warrior baıqaýynda baǵyn synaýda, dep habarlaıdy aqshamnews.kz.
Qorǵanys mınıstrliginiń málimetinshe, Qazaqstannyń namysyn ótken jyly kásibı saıysta júldeli oryndarǵa ıe bolǵan 54835-A áskerı bólimi batalónynyń serjanty 3-synypty serjant Aslan Darhan men 18404 áskerı bólimi rotasynyń 3-synypty gvardıa serjanty Raýan Toqtarbekov qorǵaýda.
18 mamyrǵa deıin sozylatyn baıqaýǵa AQSH-tyń 7 shtatynan, Fıdjı, Gýam, Tonga jáne Fılıppınnen kelgen áskerı qyzmetshiler saıysyp jatyr. Arızona Ulttyq gvardıasy jyl saıyn Best warrior baıqaýyn ótkizip, onda áskerı qoldanbaly pánderden úzdik dep tanylǵan serjanttardy anyqtaıdy.
Saıys armıalyq jaýyngerlik fıtnes testi, jaýyngerlik daıarlyqty oqytý pánderinen normatıvterdi oryndaý, túngi kúzet, kartamen jumys, aımaqty baǵalaý jáne azımýt boıynsha qozǵalys, jergilikti jerdi patrúldeý, taktıkalyq medısına, M-240V pýlemetinen, M-4 avtomatynan, M-17 tapanshasynan atý, arnaıy áskerı saýytpen jáne 12 keli júkpen 22 shaqyrymǵa marsh júgirý syndy 10 negizgi jarystan turady.
Dúbirli dodada AQSH armıasynyń qarý-jaraǵymen jáne quraldarynda jattyǵýlar men normatıvterdi oryndasa da bizdiń áskerı qyzmetshiler tamasha nátıjeler kórsetip jatyr. Naqtyraq aıtsaq, 3-synypty serjant Darhan Aslan 800 metrge júgirýde qashyqtyqty 2 mınýt 5 sekýndta eńserip, úzdik nátıje kórsetti. Onyń kórsetken nátıjesi Arızona shtatynyń Ulttyq gvardıa baıqaýynyń búkil tarıhyndaǵy rekord retinde tirkeldi.