Qasym-Jomart Toqaevtyń atyna ulttyq mereke – Respýblıka kúnine oraı shet memleketterdiń basshylary men halyqaralyq uıymdardyń jetekshilerinen quttyqtaý hattary kelip jatyr.
Reseı Federasıasynyń Prezıdenti Vladımır Pýtın jedelhatynda eki el arasyndaǵy qarym-qatynas strategıalyq seriktestik jáne odaqtastyq rýhynda tabysty damyp jatqanyna, sondaı-aq Máskeý men Astana túrli kópjaqty qurylymdar aıasynda belsendi baılanys ornatqanyna toqtaldy.
– Birlesken kúsh-jigerimiz arqyly halyqtarymyzdyń ıgiligi jáne Eýrazıa keńistigindegi qaýipsizdik pen turaqtylyqty nyǵaıtý jolynda ekijaqty yntymaqtastyqtyń barlyq baǵytyn odan ári jandandyra túsetinimizge senimdimin, – dep jazdy Vladımır Pýtın.
Qytaı Halyq Respýblıkasynyń Tóraǵasy Sı Szınpın Qazaqstannyń óńirlik jáne halyqaralyq deńgeıde yqpaly arta túskenin atap ótip, bul jetistikterge tatý kórshi, jan-jaqty strategıalyq seriktes retinde óz halqynyń shynaıy qýanatynyn aıtty.
– Eki el arasyndaǵy ózara tıimdi seriktestikti odan ári ilgeriletý jáne yqpaldastyqty jańa deńgeıge kóterý úshin Sizben kúsh-jiger biriktirýge daıynmyn, – dep jazylǵan QHR Tóraǵasynyń jedelhatynda.
Amerıka Qurama Shtattarynyń Prezıdenti Djozef Baıden Qasym-Jomart Toqaev pen Qazaqstan halqyna joldaǵan quttyqtaý jedelhatynda elderimiz arasyndaǵy strategıalyq seriktestik táýelsizdik, aýmaqtyq tutastyq sıaqty Birikken Ulttar Uıymynyń qaǵıdattaryna negizdelgenine nazar aýdarǵan.
– Atalǵan qaǵıdattardy berik ustanǵan Qazaqstanmen qaýipsizdik, ekonomıka jáne ekologıa máselelerin sheshý jolyndaǵy birlesken jumysty jalǵastyrýǵa múddelimiz, – dep jazdy Djozef Baıden.
Ulybrıtanıa men Soltústik Irlandıa Birikken Koróldiginiń Koroli III Charlz Qazaqstanmen yqpaldastyqty joǵary baǵalap, elderimiz beıbitshilik, qorshaǵan ortany qorǵaý, klımattyń ózgerýi sıaqty jahandyq mańyzdy máseleler boıynsha ornatqan tyǵyz baılanysty jalǵastyratynyna senim bildirdi.
Fransıa Prezıdenti Emmanúel Makron óziniń quttyqtaýynda eki eldi kópjaqty yntymaqtastyq biriktiretinin aıtty.
– Biz túrli qurylymdar aıasyndaǵy baılanysymyzdy bekitip, seriktestigimizdiń kókjıegin keńeıte túsemiz dep úmittenemin, – dep jazǵan Fransıa Prezıdenti.
Túrkıa Prezıdenti Rejep Taııp Erdoǵan baýyrlas halyqtar arasyndaǵy qarym-qatynas ortaq tilimiz ben tarıhymyzdan jáne mádenıetimizden qýat ala otyryp, odan ári tereńdeı túsetinine kámil senetinin atap ótken.
– Qazaqstannyń túrki áleminiń birligine erekshe mán berýin jáne Túrki memleketteri uıymyn nyǵaıtýdaǵy jetekshi rólin joǵary baǵalaımyz, – delingen Túrkıa Prezıdentiniń jedelhatynda.
Ózbekstan Prezıdenti Shavkat Mırzıóev óz quttyqtaýynda Qazaqstanda aýqymdy ózgerister oryn alyp, memleket pen qoǵam ómiriniń barlyq salasynda keshendi ári júıeli reformalar júrgizilip jatqanyn jáne eldiń halyqaralyq arenadaǵy abyroı-bedeli arta túskenin aıtqan.
Qyrǵyzstan Prezıdenti Sadyr Japarov táýelsiz el bolǵan sátten bastap baýyrlas Qazaqstan memlekettiń irgesin nyǵaıtý, saıası jáne áleýmettik-ekonomıkalyq turǵydan damý, belsendi syrtqy saıasat júrgizý isinde aıtarlyqtaı tabysqa qol jetkizgenine toqtalǵan. Sondaı-aq eki el arasyndaǵy yntymaqtastyq odan ári damı beretinine senim bildirgen.
Tájikstan Prezıdenti Emomalı Rahmon strategıalyq seriktestik pen odaqtastyq qaǵıdattaryna negizdelgen dostyq pen ózara tıimdi baılanystardy odan ári nyǵaıtýǵa daıyn ekenin málimdegen.
Túrikmenstan Prezıdenti Serdar Berdimuhamedov túrikmen-qazaq yqpaldastyǵy kóptegen baǵytta jandanyp kele jatqanyna basa mán berip, oǵan joǵary deńgeıdegi ashyq ári dostyq dıalog oń áser etip otyrǵanyn jazǵan. Elimizdiń ulttyq merekesine oraı jyly lebizin Túrikmenstan Halk Maslahatynyń Tóraǵasy Gýrbangýly Berdimuhamedov te joldady.
Ázerbaıjan Prezıdenti Ilham Álıev jedelhatynda óz eliniń Qazaqstanmen saýda-ekonomıkalyq, mádenı-gýmanıtarlyq salalarda nátıjeli seriktestikti damytýǵa jáne birlesken jobalardy júzege asyrýǵa nıetti ekenin jetkizdi.
Sonymen qatar quttyqtaý jedelhattaryn Qos kıeniń saqshysy, Saýd Arabıasynyń Koroli Salman ben Ábdelazız Ál Saýd, Saýd Arabıasynyń Taq murageri, Premer-mınıstri Muhammed ben Salman ben Ábdelazız Ál Saýd, Rım Papasy Fransısk, Japonıa Imperatory Narýhıto, Marokko Koroli VI Muhammed, Bahreın Koroli Hamad ben Isa Ál Halıfa, Oman Sultany Haısam ben Tarıq, Nıderland Koroli Vıllem-Aleksandr, Belgıa Koroli Fılıpp, Shvesıa Koroli Karl Gýstav, Ispanıa Koroli VI Felıpe, Taıland Koroli Maha Vachıralongkorn, Germanıanyń Federaldyq Prezıdenti Frank-Valter Shtaınmaıer, Úndistan Prezıdenti Draýpadı Mýrmý, Koreıa Respýblıkasynyń Prezıdenti Iýn Sok Ól, Belarýs Prezıdenti Aleksandr Lýkashenko, Italıa Prezıdenti Serdjo Mattarella, Shveısarıa Prezıdenti Vıola Amherd, Chehıa Prezıdenti Petr Pavel, Slovakıa Prezıdenti Peter Pellegrını, Portýgalıa Prezıdenti Marselý Rebelý de Soza, Iran Prezıdenti Masýd Pezeshkıan, BAÁ Prezıdenti sheıh Muhammed ben Zaıd Ál Nahaıan, Mysyr Prezıdenti Ábdel Fattah As-Sısı, Indonezıa Prezıdenti Prabovo Sýbıanto, Palestına Prezıdenti Mahmýd Abbas, Sıngapýr Prezıdenti Tarman Shanmýgaratnam, Aýstrıa Prezıdenti Aleksandr Van der Bellen, Fınlándıa Prezıdenti Aleksandr Stýbb, Horvatıa Prezıdenti Zoran Mılanovıch, Bolgarıa Prezıdenti Rýmen Radev, Majarstan Premer-mınıstri Vıktor Orban, Armenıa Premer-mınıstri Nıkol Pashınán, Armenıa Prezıdenti Vaagn Hachatýrán, Lıtva Prezıdenti Gıtanas Naýseda, Latvıa Prezıdenti Edgars Rınkevıchs, Estonıa Prezıdenti Alar Karıs, Albanıa Prezıdenti Baıram Begaı, Izraıl Prezıdenti Ishak Gersog, Vetnam Prezıdenti Kyong Lyong, Rýmynıa Prezıdenti Klaýs Verner Iohannıs, Kıpr Prezıdenti Nıkos Hrıstodýlıdıs, Ońtústik Afrıka Respýblıkasynyń Prezıdenti Matamela Sırıl Ramafosa, Serbıa Prezıdenti Aleksandr Výchıch, Irak Premer-mınıstri Muhammed Shıa ál-Sýdanı, BAÁ Vıse-prezıdenti, Premer-mınıstri, Dýbaı ámirshisi sheıh Muhammed ben Rashıd Ál Maktým, BAÁ Vıse-prezıdenti, Premer-mınıstrdiń orynbasary, Prezıdent Ákimshiliginiń basshysy sheıh Mansur ben Zaıd Ál Nahaıan, Kanadanyń general gýbernatory Merı Saımon, Eýropalyq Keńestiń Prezıdenti Sharl Mıshel, Shanhaı Yntymaqtastyq Uıymynyń Bas hatshysy Chjan Mın, Túrki memleketteri uıymynyń Bas hatshysy Kýbanychbek Ómirálıev, Tatarstan Raısy Rýstam Mınnıhanov jáne basqalary joldady.
Quttyqtaý jedelhattary áli de kelip túsip jatyr.