Respýblıka kúnine oraı Almatyda Memlekettik Týdy kóterý jáne Ánurandy oryndaý saltanatty rásimi ótti. Otansúıgishtik rýhty kóterý maqsatynda uıymdastyrylǵan bul shara "Medeý" bıik taýly sport kesheninde ótti.
Jıynǵa Almaty qalasynyń ákimi Erbolat Dosaev, máslıhat depýtattary, memleket jáne qoǵam qaıratkerleri, jastar uıymdarynyń ókilderi men qala turǵyndary qatysty. Saltanatty rásimnen keıin ashyq aspan astynda konsert uıymdastyryldy, onda qazaqstandyq estrada juldyzdary qala turǵyndary men qonaqtary úshin óner kórsetti.
Almaty qalasy Qoǵamdyq damý basqarmasynyń basshysy Aıdar Esenbekovtyń aıtýynsha, 25 qazan – táýelsizdikke alǵashqy qadam jasalǵan tarıhı mańyzdy kún. Egemendik týraly deklarasıa dál Almatyda qabyldanǵan, sondyqtan Respýblıka kúni almatylyqtar úshin erekshe qasterli data bolyp sanalady.
"Respýblıka kúnin merekeleý aıasynda Almatyda birneshe kún boıy túrli is-sharalar uıymdastyrylýda. Búgin Medeý shatqalynda ornalasqan Tý tuǵyrynyń janynda "Meniń Týym, meniń Gımnim" atty patrıottyq shara ótkizdik. Bul dástúrge aınalyp kele jatqan sharada jyl saıyn osy jerde jınalyp, Ánuranymyzdy shyrqap, Memlekettik Týymyzdy kókke kóteremiz. Jastarǵa osy kúnniń mánin túsindirý, patrıottyq sezimdi oıatý – bizdiń basty maqsatymyz", – dep atap ótti Aıdar Esenbekov.
Mańyzdy mereke
1990 jyly Qazaqstannyń egemendigi týraly deklarasıanyń qabyldanýy – elimizdiń tarıhyndaǵy mańyzdy oqıǵalardyń biri. Bul kún Qazaqstannyń táýelsizdik jolyndaǵy alǵashqy qadamy retinde eseptelip, 2022 jyldan bastap qaıtadan ulttyq mereke deńgeıine kóterildi. Sońǵy úsh jyldan beri Respýblıka kúni aıasynda eldiń túkpir-túkpirinde keń aýqymdy is-sharalar ótip keledi.
Bolashaq – jastardyń qolynda
Jıynnyń negizgi maqsaty – jastarǵa elimizdiń táýelsizdigi men erkindigi týraly túsinik qalyptastyryp, patrıottyq tárbıe berý. Osy maqsatta jyl saıyn Memlekettik Tý astynda Ánuran shyrqap, ortaq maqsattar men qundylyqtarǵa adaldyqty bildirý dástúrge aınalyp otyr.
Almatydaǵy "Meniń Týym, meniń Gımnim" patrıottyq sharasy – elimizdiń bolashaǵy jastardyń júregine táýelsizdik pen birlik qundylyqtaryn sińiretin mańyzdy qadamdardyń biri. Qala turǵyndary úshin bul merekelik shara tek kóńil kóterý ǵana emes, ortaq qundylyqtarymyzdy sezinip, elimizdiń mártebesin asqaqtatýǵa arnalǵan erekshe múmkindik.