UQSHU-ny BUU-nyń bitimgershilik qyzmetimen baılanystyrý mindetin kún tártibine qoıý qajet
Qasym-Jomart Toqaev Ujymdyq qaýipsizdik týraly shartqa qol qoıylǵanyna 30 jyl jáne Uıymnyń qurylǵanyna 20 jyl tolýyna oraı ótken UQSHU-ǵa múshe memleketterdiń Ujymdyq qaýipsizdik keńesiniń mereıtoılyq sesıasyna qatysty, dep habarlaıdy Almaty-akshamy.kz Aqorda saıtyna silteme jasap.
Mereıtoılyq jıynǵa Qazaqstan kóshbasshysynan basqa Armenıanyń Premer-mınıstri Nıkol Pashınán, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Reseı Prezıdenti Vladımır Pýtın, sondaı-aq UQSHU-nyń bas hatshysy Stanıslav Zas qatysty.
Qasym-Jomart Toqaev kezdesýge qatysqandarǵa iltıpat bildirip, mereıtoılyq sesıany uıymdastyrǵany úshin Vladımır Pýtınge rızashylyǵyn bildirdi.
Qazaqstan Prezıdenti UQSHU-nyń 30 jyl ishinde odan ári damý úshin zor áleýeti bar kópjaqty yntymaqtastyqtyń naqty mehanızmi retinde qalyptasqanyn atap ótti.
Qasym-Jomart Toqaev beıbitshilik pen turaqtylyqty, halyqaralyq jáne aımaqtyq qaýipsizdikti saqtaý, múshe memleketterdiń aýmaqtyq tutastyǵy men egemendigin qorǵaý UQSHU-nyń basty mindeti ekenin aıtty. Prezıdent UQSHU-nyń turaqty jumys organdarynyń tabysty qyzmetine, ártúrli formattaǵy tyǵyz yntymaqtastyqty, sondaı-aq Uıymnyń kúshtik, quqyq qorǵaý jáne bitimgershilik áleýetin kúsheıtý máselesine toqtaldy.
Memleket basshysy sóılegen sózinde halyqaralyq terorızm men ekstremızmge, zańsyz esirtki jáne qarý-jaraq aınalymyna, kóshi-qonǵa, sonyń ishinde Aýǵanstandaǵy ahýaldyń órshýine qarsy is-qımyl máselelerine erekshe nazar aýdardy.
«Aýǵanstandaǵy jaǵdaı, sondaı-aq osy eldiń aýmaǵyndaǵy qarýly toptardyń belsendi áreketi memleketterimizdiń qaýipsizdigi men turaqtylyǵyna qater tóndirip otyr. UQSHU barlyq yqtımal qaýip-qaterlerdi eskerip, Ortalyq Azıanyń ońtústik shekaralarynyń qaýipsizdigin qamtamasyz etýge kóbirek kóńil bólýi kerek dep esepteımin», – dedi Qazaqstan Prezıdenti.
Qasym-Jomart Toqaev UQSHU bitimgershilik kúshteriniń áleýetin nyǵaıtý Uıym qyzmetiniń taǵy bir ózekti mindeti ekenin aıtty.
«Bizdiń oıymyzsha, qazirdiń ózinde UQSHU-ny BUU-nyń bitimgershilik qyzmetimen baılanystyrý mindetin kún tártibine qoıý qajet. Bul qadam Ujymdyq qaýipsizdik sharty uıymynyń sýbekt retindegi quqyǵyn nyǵaıtady. Sondaı-aq Uıymnyń beıbitshilikti saqtaý jónindegi halyqaralyq bitimgershilik operasıalarǵa qatysý tájirıbesin qamtamasyz etedi», – dedi Memleket basshysy.
Kezdesý qorytyndysy boıynsha UQSHU-ǵa múshe memleketterdiń basshylary Ujymdyq qaýipsizdik keńesiniń mereıtoılyq málimdemesin qabyldady.