Saýdtyq dıplomat Qazaqstan Prezıdentin elimizde referendýmnyń tabysty ótýimen quttyqtady.
Memleket basshysy Qasym-Jomart Toqaev Qazaqstanǵa resmı saparmen kelgen Saýd Arabıasy Koróldiginiń Syrtqy ister mınıstri Feısal ben Farhan Ál Saýdty qabyldady, dep habarlaıdy Almaty-akshamy.kz Aqordaǵa silteme jasap.
Kezdesý barysynda saıası, saýda-ekonomıkalyq, ınvestısıalyq jáne mádenı-gýmanıtarlyq yntymaqtastyqty nyǵaıtýǵa basa mán bere otyryp, Qazaqstan men Saýd Arabıasy arasyndaǵy qatynastardy damytýdyń perspektıvalary talqylandy.
Memleket basshysy Koróldiktiń syrtqy saıası vedomstvo basshysyna iltıpat bildire otyryp, onyń bul sapary elimizdiń tarıhyndaǵy betburysty sátpen – jalpyulttyq referendýmmen tuspa-tus kelgenin atap ótti. Atalǵan asa mańyzdy sharanyń qorytyndysy Jańa Qazaqstan qurýǵa kirisýge múmkindik beredi.
Qasym-Jomart Toqaev Saýd Arabıasy Qazaqstannyń arab jáne ıslam álemindegi basty seriktesiniń biri ekenin atap ótti.
«Elderimiz ortaq qundylyqtarǵa negizdelgen saıası dıalogty dostyq pen ózara senim rýhynda dáıekti túrde damyta beredi. Eki qasıettiniń Saqtaýshysy Koról Salman ben Ábdel Ázızben jáne Taq murageri Muhammed ben Salmanmen aradaǵy tabysty yntymaqtastyqty odan ári jalǵastyrýǵa daıyn ekenimizdi bildiremin», – dedi Prezıdent.
Qasym-Jomart Toqaev aýyl sharýashylyǵy, munaı hımıasy, týrızm, taý-ken metalýrgıasy jáne qarjy salalaryndaǵy birlesken jobalardy júzege asyrý úshin qolaıly ınvestısıalyq múmkindikterdiń bar ekenine nazar aýdardy.
Bul rette Memleket basshysy Qazaqstan men Saýd Arabıasynyń úkimetaralyq komısıasy men İskerlik keńestiń jumysyn jandandyrý mańyzdy ekenine toqtaldy. Sondaı-aq tıisti kelissózderdi júrgizý úshin ókiletti úkimettik delegasıany Er-Rıadqa jiberýge daıyn ekenin aıtty.
Budan bólek Memleket basshysy Mekke men Medınede qazaqstandyq qajylarǵa qajetti jaǵdaı jasalatyny jáne dástúrli qonaqjaılyq kórsetiletini úshin Koróldiktiń basshylyǵyna rızashylyǵyn bildirdi.
Feısal ben Farhan Ál Saýd Saýd Arabıasy Koroli men Taq murageriniń Prezıdent Qasym-Jomart Toqaevqa jáne Qazaqstan halqyna joldaǵan sálemin jetkizdi.
Mınıstr eki memleket arasyndaǵy qarym-qatynastardyń dáıekti túrde damyp kele jatqanyn atap ótti. Sondaı-aq Koróldik basshylyǵynyń dıplomatıalyq baılanystar ornaǵannan bergi jan-jaqty yntymaqtastyq baǵyttaǵy jetistikterdi joǵary baǵalaıtynyn aıtty.
Saýdtyq dıplomat Qazaqstan Prezıdentin elimizde referendýmnyń tabysty ótýimen quttyqtady.
«Saýd Arabıasy Koróldigi Sizdiń basshylyǵyńyzben Ekinshi Respýblıkany qurý isinde jáne Qazaqstannyń odan ári órkendeýine baǵyttalǵan aýqymdy reformalardy júzege asyrýdy jalǵastyrýda tabys tileıdi», – dedi mınıstr.
Feısal ben Farhan Ál Saýd saýda-ekonomıkalyq jáne ınvestısıalyq yqpaldastyqty nyǵaıtýdyń perspektıvalaryn egjeı-tegjeıli talqylaý úshin qazaqstandyq seriktestermen kezdesý uıymdastyrýǵa Saýd Arabıasy tarapynyń daıyn ekenin jetkizdi. Bul jýyq arada Qazaqstanda joǵary deńgeıdegi kezdesý ótkizý úshin berik negiz bolady.
Sonymen qatar kezdesýde olar halyqaralyq kún tártibiniń ózekti máseleleri jóninde pikir almasty.
Áńgimelesý sońynda Qasym-Jomart Toqaev Koról Salman ben Ábdel Ázızge jáne Taq murageri Muhammed ben Salman Ál Saýdqa júrekjardy sálemin joldady.