Operasıa sátti ótti.
Qalqamandaǵy №7 aýrýhananyń dárigerleri sırek kezdesetin jaryqty alyp tastady. Ota aýrýhanadaǵy omyrtqa hırýrgıasy bólimshesinde mindetti áleýmettik medısınalyq saqtandyrý sheńberinde jasaldy, dep habarlaıdy Almaty-akshamy.kz aýrýhananyń baspasóz qyzmetine silteme jasap.
Habarlamaǵa súıensek, pasıent uzaq ýaqyt boıy arqasy aýyrǵanyn aıtqan. Keıde tipti, aıaǵy men qoly uıyp, júre almaı qalatyn.
«Bul aýrýdyń belgileri ártúrli bolýy múmkin. Mysaly, ish qurylysy, júrektiń tusy aýyrýy múmkin. Adam entigip, tynys alýy qıyndaıdy, ót pen baýyr tusy shanshyp aýyrady. Ýaqtyly emdelmese, pasıent júre almaı, sal bolyp qalýy da yqtımal», - deıdi bólimshe meńgerýshisi Baqyt Aǵlaqov.
Aıtýynsha, omyrtqanyń keýde tusyndaǵy jaryq óte sırek kezdesedi jáne óte qaýipti aýrý bolyp esepteledi. Sondyqtan mundaı belgiler baıqalǵan jaǵdaıda birden neırohırýrg mamanǵa qaralǵan jón.
«Kóp jaǵdaıda pasıentterge ota jasaý týraly keńes beriledi. Biz bul pasıentke de ota jasap, jaryqty alyp tastadyq. Operasıa sátti ótti, naýqas otadan keıin ózdigimen júrip-tura bastady, keýde tusynyń aýyrǵany basyldy», - deıdi dáriger.
Mamandar omyrtqa arasyndaǵy tinderdiń syrtqa shyǵyp, jaryq paıda bolýyna jol bermeý úshin jıi ári uzaq serýendeýge keńes beredi. Júzý, ıoga, gımnastıkamen aınalysý, jumys ornynda tik, durys otyrý, tańerteń jáne kúni boıy jattyǵý jasaý arqyly bul derttiń aldyn alýǵa bolady. Sonymen qatar, artyq salmaq ta omyrtqada jaryq paıda bolýyna ákep soqtyrady. Sol sebepti zıandy, ashshy jáne maıly taǵamdardan bas tartyp, jemis-kókónistermen paıdaly tamaqtaný qajet, - deıdi mamandar.