Ózara tıimdi kooperasıa máseleleri talqylandy.
Kezdesý barysynda saýda, mashına jasaý, kólik jáne aýyl sharýashylyǵy salalary boıynsha Qazaqstan óńirleriniń Omby oblysymen aradaǵy ózara tıimdi kooperasıa máseleleri talqylandy, dep habarlaıdy Almaty-akshamy.kz Aqordaǵa silteme jasap.
Prezıdent óńiraralyq tabysty yqpaldastyqtyń ózara saýda-sattyqqa oń yqpal etetinin aıtty.
«Biz óńiraralyq yntymaqtastyqty damytýǵa basa mán beremiz. Bul baǵytta Omby aımaǵy erekshe oryn alady. Omby oblysy men Qazaqstan Respýblıkasy arasyndaǵy taýar aınalymy 380 mıllıon dollardan asty. Qazaqstan – Omby oblysynyń nómiri birinshi seriktesi. Bizdiń otandastarymyz, qazaqtar, turatyn bul shekaralas aımaqtyń mańyzy zor», – dedi Memleket basshysy.
Memleket basshysy Omby jerinde ómir súrip jatqan qazaq dıasporasynyń eki jaqty baılanystyrýshy altyn kópir ekenin atap ótti jáne qandastarymyzdyń tarıhı Otanymen rýhanı baılanys jasaýyna erekshe mán berip, jan-jaqty qoldaý kórsetip otyrǵany úshin Aleksandr Býrkovqa alǵys bildirdi.
Sonymen qatar Memleket basshysy Omby óńirinde qazaq halqynyń uly perzentteri Shoqan Ýálıhanov pen Sáken Seıfýllındi ulyqtaǵany úshin oblys ákimshiligi men turǵyndaryna qazaqstandyqtardyń rızashylyǵy sheksiz ekenin jetkizdi.
Óz kezeginde gýbernator Aleksandr Býrkov aımaqtyń agroónerkásip kesheni, azyq-túlik ónimderin óndirý, munaı hımıa jáne qurylys sektory sıaqty salalar boıynsha qazaqstandyq kompanıalarmen yntymaqtastyq ornatýǵa daıyn ekenin aıtty.