Kompanıa basshylary josparlarymen bólisti.
Memleket basshysy Qasym-Jomart Toqaev halyqaralyq kompanıalardyń basshylarymen birqatar kezdesý ótkizdi, dep habarlaıdy Almaty-akshamy.kz Aqordaǵa silteme jasap.
Prezıdent Qasym-Jomart Toqaev Sheteldik ınvestorlar keńesiniń 34-otyrysy qarsańynda «Fortescue Future Industries» kompanıasynyń negizin qalaýshy ári dırektorlar keńesiniń tóraǵasy Endrú Forresti, sondaı-aq «Polımetal ÝK» aksıonerlik qoǵamynyń prezıdenti Igor Fınogenovti qabyldady.
Endrú Forrestpen kezdesý barysynda kómirtegin az paıdalana otyryp damý máselesi talqylandy. Bul – Qazaqstannyń strategıalyq maqsattarynyń biri. «Fortescue Future Industries» kompanıasy dırektorlar keńesiniń tóraǵasy Prezıdentke kompanıanyń elimizdegi jel energetıkasy jáne jasyl sýtegin óndirý jobalaryna ınvestısıa salý jospary týraly aıtty.
Igor Fınogenov Qasym-Jomart Toqaevqa álemdegi iri taý-ken jáne altyn óndirýshi kompanıalardyń qataryna kiretin «Polımetal ÝK» aksıonerlik qoǵamynyń jumysy týraly málimet berdi. Kásipker Memleket basshysyna geologıalyq barlaý jumystaryn júrgizý jáne kún elektr stansıalaryn salý jónindegi josparyn aıtty.