Memleket basshysy qazaq-fransýz bıznes forýmy aıasynda Fransıanyń bıznes qurylymdarynyń basshylarymen kezdesti, dep habarlaıdy almaty-akshamy.kz
Lactalis Group kompanıasynyń bas dırektory Emmanúel Benemen áńgimelesý barysynda Memleket basshysy atalǵan kásiporyn Qazaqstan naryǵyna 20 jyl buryn kelgen alǵashqy fransýz kompanıalarynyń biri ekenin atap ótti. Búginde bul kásiporynnyń birneshe zaýyty men sút fermalary elimizde tabysty jumys istep jatyr.
Qasym-Jomart Toqaevtyń aıtýynsha, azyq-túlik qaýipsizdiginiń jahandyq syn-qaterlerine baılanysty agroónerkásip jáne azyq-túlik ónimderin óndirý salalaryndaǵy yntymaqtastyqtyń mán-mańyzy artyp keledi. Osyǵan oraı Qazaqstan aýyl sharýashylyǵy ónimderin tereń óńdeý isine ınvestısıa tartýdy yntalandyrady.
Emmanúel Bene qabyldaǵany úshin Memleket basshysyna alǵys aıtyp, Lactalis Group kompanıasynyń yntymaqtastyqty nyǵaıtý jáne Qazaqstanda jańa óndiris oryndaryn ashý josparymen bólisti.
Sodan keıin Memleket basshysy Boehringer Ingelheim France kompanıasynyń prezıdenti Krıstıan Vaızendi qabyldady. Kezdesý barysynda Qasym-Jomart Toqaev otandyq QazBioPharm holdıńi men Fransıanyń Boehringer Ingelheim kompanıasy arasynda tehnologıalardy berý týraly qol jetkizilgen kelisimniń mańyzdylyǵyn atap ótti. Bul Qazaqstanda aýsylǵa qarsy vaksına óndirisin jolǵa qoıýǵa múmkindik beredi. Memleket basshysynyń aıtýynsha, veterınarıa salasyn damytý azyq-túlik qaýipsizdigin qamtamasyz etýde erekshe ról atqarady.
Qazaqstan Prezıdenti elimizde bıotehnologıa klasterin qurý jumystary belsendi júrgizilip jatqanyn jáne osy saladaǵy otandyq ǵylymı saraptama jasaý isin damytý úshin QazBioPharm ulttyq bıofarmasevtıkalyq holdıńi qurylǵanyn aıtty.
Sonymen qatar Prezıdent Semmaris kompanıasynyń bas dırektory Stefan Laıanımen kezdesti. Stefan Laıanı Qasym-Jomart Toqaevqa Almaty oblysynda aýyl sharýashylyǵy ónimderin óńdeıtin iri hab qurý jónindegi birlesken jobanyń iske asyrylýyna qatysty málimet berdi. Nysan 2025 jyly paıdalanýǵa beriledi dep josparlanyp otyr. Qazirgi ýaqytta Qazaqstan ınvestısıasynyń jalpy kólemi 150 mıllıon dollardy quraıdy. Kompanıa óz tarapynan jobany júzege asyrýdyń bastapqy kezeńinde tehnologıalar men Fransıanyń ozyq tájirıbesin transfert jasaıdy.