Kezdesý barysynda yntymaqtastyqtyń basym baǵyttary talqylandy.
Qazaqstan Prezıdenti Qasym-Jomart Toqaev BUU Bas Assambleıasynyń tóraǵasy Volkan Bozkyrmen kezdesý ótkizdi, dep habarlaıdy Akmaty-akshamy.kz Akorda.kz saıtyna silteme jasap.
Kezdesý barysynda Qazaqstan men Birikken Ulttar Uıymy arasyndaǵy yntymaqtastyqtyń basym baǵyttary talqylandy. Pandemıaǵa qarsy kúrestegi birlesken is-qımyldarǵa, sondaı-aq, óńirlik qaýipsizdik pen turaqtylyqty qamtamasyz etýge erekshe nazar aýdaryldy.
Prezıdent Qasym-Jomart Toqaev BUU Bas Assambleıasynyń tóraǵasy Volkan Bozkyrdyń Qazaqstan men aımaqqa jasaǵan sapary Ortalyq Azıanyń róli artyp kele jatqanyn kórsetetinin atap ótti.
«Ortalyq Azıada bolyp jatqan ahýaldy baǵalaý turǵysynan Sizdiń bul saparyńyz asa mańyzdy. Atalǵan aımaq jahandyq saıasat aıasynda zor mańyzǵa ıe bolyp kele jatyr. Ózińizdi BUU Bas Assambleıasynyń saılanǵan tóraǵasy retinde kórgenime qýanyshtymyn. Sizdiń osy jaýapty ári mańyzdy mısıańyz tabysty bolady dep oılaımyn. Biz Birikken Ulttar Uıymyn mýltılateralızmniń dińgegi retinde qarastyramyz. Qazaqstan BUU-nyń maqsattaryn tolyq qoldaıdy. Assambleıa Sizdiń dana basshylyǵyńyzben Uıymnyń maqsatyna qol jetkizýine, ásirese, qalypty ómirdiń barlyq salasyna áser etken pandemıanyń teris saldary kezinde eleýli úles qosady», – dedi Qazaqstan Prezıdenti.
Memleket basshysy halyqaralyq qoǵamdastyqtyń pandemıa saldaryna qarsy kúreste judyryqtaı jumylýy qajet dep sanaıdy.
«Qazaqstan halyqaralyq qoǵamdastyqtyń jaýapty múshesi retinde daǵdarystyń saldaryn eńserý úshin barlyq kúsh-jigerin jumsaıdy. Biz ózimizdiń tól vaksınamyzdy ázirledik. Keleshekte, qajet bolǵan jaǵdaıda, ony muqtaj elderge usynýǵa daıynbyz», – dedi Prezıdent.
Volkan Bozkyr Qasym-Jomart Toqaevqa jyly qabyldaǵany úshin alǵys aıtyp, Qazaqstannyń BUU Qaýipsizdik Keńesine tóraǵalyǵynyń qorytyndylaryn, sondaı-aq, Sırıa qaqtyǵysyn retteý úshin júrgizgen jumystaryn joǵary baǵalady.
«Qazaqstan Birikken Ulttar Uıymynyń jumysyna óte belsendi atsalysady. Siz BUU júıesinde kóp jyl jumys istedińiz. Tájirıbeńiz mol. Eldiń basshylyǵy da Uıymmen belsendi yqpaldastyq jasaıdy. Qazaqstannyń Sırıa qaqtyǵysyn Astana prosesi retinde belgili beıbit jolmen retteýge qosqan úlesin qoldaımyn», – dedi BUU Bas Assambleıasynyń tóraǵasy.
Sonymen qatar áńgimelesý barysynda Aýǵanstandaǵy ahýalǵa baılanysty óńirlik qaýipsizdik pen turaqtylyqty qamtamasyz etý máseleleri de sóz boldy.