Memleket úkimeti 2030 jylǵa qaraı ósiriletin balyq kólemin jylyna 270 myń tonnaǵa jetkizýdi kózdep otyr.
Qazaqstanda 2030 jylǵa deıin 1283 jańa balyq ósirý sharýashylyǵy qurylyp, búgingi kúni jumys istep turǵan 288 balyq ósirý sharýashylyqtarynyń ósirý kólemi ulǵaıtylady, dep habarlaıdy Almaty-akshamy.kz.
Ekologıa, geologıa jáne tabıǵı resýrstar mınıstrliginiń deregi boıynsha, 2021 jyldyń sońyna deıin balyq sharýashylyǵyn damytýdyń 2021-2030 jyldarǵa arnalǵan óńirlik baǵdarlamalarynda kózdelgen 600-ge jýyq jobany iske asyrý josparlanǵan.
Jospar boıynsha, Almaty oblysynda balyq ósirý boıynsha bes jobany júzege asyrý bastaldy.
Birinshi. Qapshaǵaı qalasynda «Jylyna 10 myń tonna ósirý kólemimen «Barrablue» avstralıalyq kompanıasynyń ozyq tehnologıasy boıynsha Qazaqstanda ınovasıalyq balyq ónerkásibi keshenin qurý» jobasy. Olar barramýndı balyqtaryn ósirýdi josparlap otyr.
Aýdany 35 gektar jer ýchaskesi alyndy. Investısıa kólemi 45 mlrd. teńgeni quraıdy. Búgingi kúni ýchaskeni balyq ósirý kesheniniń qurylysyna daıyndaý boıynsha jer jumystary júrgizilýde. Qurylystyń bastalýy bıylǵy jylǵy tamyz aıyna josparlanǵan. Atalǵan jobany iske asyrý merzimi 2021-2022 jyldar.
Ekinshi. «Qorǵas – Shyǵys qaqpasy» arnaıy ekonomıkalyq aımaǵy aýmaǵynda «Russian friends Capital» reseılik kompanıasynyń qatysýymen qýaty 2500 tonna atlantıkalyq aqserke ósiretin zaýyt salý jobasy.
Jobany iske asyrý merzimi - 2021-2022 jj.15,7 mlrd. teńge jeke ınvestısıalardy tartý josparlanýda.
«Týloma Salmon Qazaqstan» JSHS men «Qorǵas – Shyǵys qaqpasy» arnaıy ekonomıkalyq aımaǵy Basqarýshy kompanıasy arasynda jobany iske asyrý nıeti týraly Memorandýmǵa qol qoıyldy. Zaýyt qurylysy úshin aýdany 10 gektar jer ýchaskesi anyqtaldy.
Osy jobany «Qorǵas – Shyǵys qaqpasy» arnaıy ekonomıkalyq aımaǵy aýmaǵynda iske asyrý úshin kórsetilgen arnaıy ekonomıkalyq aımaq qyzmetiniń basym túrleriniń tizbesine ózgerister engizý qajet.
Qazirgi ýaqytta múddeli memlekettik organdar «Teńiz balyq sharýashylyǵyn» jáne «Tushshy sý balyq sharýashylyǵyn» qosý bóliginde «Qorǵas – Shyǵys qaqpasy» arnaıy ekonomıkalyq aımaǵy qyzmet túrlerin keńeıtýdi qoldap otyr.
Osy másele respýblıkalyq búdjet komısıasynda maquldanǵannan keıin Indýstrıa jáne ınfraqurylymdyq damý mınıstrligi «Qorǵas – Shyǵys qaqpasy» arnaıy ekonomıkalyq aımaǵy qyzmetiniń basym túrleriniń tizbesin keńeıtý bóliginde tıisti buıryqqa ózgeris engizetin bolady.
Osy másele respýblıkalyq búdjet komısıasynda maquldanǵannan keıin Indýstrıa jáne ınfraqurylymdyq damý mınıstrligi «Qorǵas – Shyǵys qaqpasy» arnaıy ekonomıkalyq aımaǵy qyzmetiniń basym túrleriniń tizbesin keńeıtý bóliginde tıisti buıryqqa ózgeris engizetin bolady.
Úshinshi. «Ónimdiligi jylyna 1600 tonna tuıyq sýmen qamtamasyz etý qondyrǵylarynda klarıı som men barramýndı ósirý boıynsha balyq ósirý sharýashylyǵyn qurý» jobasy. Jobany iske asyrý orny – Talǵar aýdany, Almaty qalasynan 25 km jerde.
Jobanyń bastamashysy «Zor Fish» JSHS aýdany 10 gektar zaýyt salý úshin jer ýchaskesin satyp aldy. Jobany Eýropalyq kompanıa jasady jáne Qazaqstan Respýblıkasynyń QNjE jáne GOST-qa beıimdeldi. Memlekettik saraptamanyń oń qorytyndysy alyndy.
Tórtinshi. «Bartoǵaı sý qoımasynda jylyna 300 tonna forel ósiretin torly balyq ósirý sharýashylyǵyn qurý» jobasy.
Atalǵan jobany iske asyrý merzimi - 2021-2022 jyldar. 700 mln. teńgege jýyq jeke ınvestısıa tartý kózdelýde.
Bul jobany iske asyrý úshin Bartoǵaı sý qoımasynyń rezervtik ýchaskesin konkýrstyq negizde bekitý qajet. Áleýetti ınvestor sý aıdyndaryn bekitip berý jónindegi konkýrs qorytyndylary boıynsha anyqtalatyn bolady.
Besinshi. «Qyzylaǵash sý qoımasynda jylyna 300 tonna forel ósiretin torly balyq ósirý sharýashylyǵyn qurý» jobasy.
Bul jobany iske asyrý merzimi - 2021-2022 jyldar. 700 mln. teńgege jýyq jeke ınvestısıa tartý kózdelýde.
Bul jobany iske asyrý úshin konkýrstyq negizde Qyzylaǵash sý qoımasynyń rezervtik ýchaskesin bekitý qajet. Áleýetti ınvestor sý qoımasynyń ýchaskesin bekitý jónindegi konkýrs qorytyndysy boıynsha anyqtalatyn bolady.
EGTRM-niń 2021 jylǵy 15 maýsymdaǵy buıryǵymen sý qoımalaryn bekitý boıynsha konkýrs ótkizý qaǵıdalaryna ózgerister engizilgenin atap ótken jón, olar bıylǵy 17 tamyzda kúshine enedi.