Aqorda rezıdensıasynda tórt memlekettiń jańadan taǵaıyndalǵan Tótenshe jáne Ókiletti elshileriniń Qazaqstan Prezıdentine senim gramotalaryn tapsyrý rásimi ótti.
İs-shara barysynda Japonıanyń elshisi Djýn Iamada, Úndistannyń elshisi Shýbdarshını Trıpatı, sondaı-aq, Kambodjanyń Qazaqstandaǵy elshisi mindetin qosa atqarýshy Kım Heng Mıe jáne Shrı-Lankanyń Qazaqstandaǵy elshisi mindetin qosa atqarýshy Lamavansa Mıgahalande Dýrage senim gramotalaryn tabystady, dep habarlady Almaty-akshamy.kz. Akorda.kz saıtyna silteme jasap.
Memleket basshysy elshilerdi dıplomatıalyq mısıalarynyń resmı bastalýymen quttyqtap, olardyń elimizdegi asa jaýapty qyzmetteri Qazaqstan Táýelsizdiginiń 30 jyldyǵymen tuspa-tus kelip otyrǵanyn atap ótti.
– Bizdiń elimiz egemendigin alǵan ýaqyttan beri kópqyrly jáne halyqaralyq quqyqqa negizdelgen teńgerimdi syrtqy saıasatyn tabysty júrgizip keledi. Shyǵys pen Batystyń ortasynda strategıalyq aýmaqta ornalasqan Qazaqstan Eýrazıaǵa qatysty máselelerde mańyzdy ról atqarady, – dedi Prezıdent.
Qasym-Jomart Toqaev sheteldik dıplomattarǵa Qazaqstannyń syrtqy saıasattaǵy basym baǵyttary, ekonomıkalyq jáne ınvestısıalyq múmkindikteri, óńirdegi qaýipsizdik pen turaqtylyqty qamtamasyz etýdegi qyzmeti, sondaı-aq, koronavırýs pandemıasy men klımattyń ózgerýine qarsy kúreste qabyldanyp jatqan sharalar jóninde málimet berdi.
Memleket basshysy óz sózinde Japonıa, Úndistan, Kambodja jáne Shrı-Lanka elderimen aradaǵy yqpaldastyq baǵytyndaǵy ekonomıkalyq múmkindikterdiń perspektıvalaryna egjeı-tegjeıli toqtaldy.
Prezıdent Japonıa Elshisimen sóıleskende onyń eli Qazaqstannyń negizgi saıası, saýda jáne ınvestısıalyq seriktesteriniń biri ekenin atap ótti.
– Qazaqstan ekonomıkasy joǵary derjava sanalatyn, sondaı-aq, tehnologıa, «jasyl» ekonomıkany damytý, bilim berý jáne áleýmettik ádildik salalary boıynsha úlgi bolyp kele jatqan Japonıamen aradaǵy yqpaldastyqty nyǵaıtýǵa basa mán beredi. Byltyr Premer-Mınıstr Óshıhıde Sýgamen telefon arqyly sóılestik. Áńgimemiz jemisti boldy. Meniń shaqyrýym boıynsha onyń Qazaqstanǵa jasaıtyn sapary jan-jaqty seriktestiktiń keleshek jol kartasyn qabyldaýǵa múmkindik beredi dep oılaımyz, – dedi Memleket basshysy.
Qasym-Jomart Toqaev Úndistanmen aradaǵy yntymaqtastyq týraly aıta kele, eki eldiń strategıalyq seriktestigine joǵary baǵa berdi.
– Sizdiń elińiz qarqyndy damyp kele jatqan ekonomıkalyq ortalyq ári mańyzdy jahandyq memleket retinde qalyptasý jolynda orasan zor jetistikke jetti. Premer-Mınıstr Modımen óte tabysty kelissóz júrgizdik. Elińizdegi jáne álemdegi jaǵdaıdyń qalypqa kelýine qaraı Nú-Delıge saparmen barý múmkindigin taǵatsyzdana kútemin, – dedi Qasym-Jomart Toqaev.
Qasym-Jomart Toqaev Kambodjamen ózara tyǵyz yqpaldastyqty damytý Qazaqstannyń Ońtústik Shyǵys Azıa aımaǵynda júrgizip otyrǵan syrtqy saıasatynyń bir bóligi ekenin aıtty.
– «Bir beldeý – bir jol» bastamasyndaǵy Qazaqstannyń atqaratyn mańyzdy róli jáne Eýrazıalyq ekonomıkalyq odaqqa múshe bolýy ASEAN memleketterimen, sonyń ishinde, Kambodjamen aradaǵy qarym-qatynasty nyǵaıtýǵa jańa múmkindikter beredi. Osy jyldyń sońynda ótetin «Azıa – Eýropa» forýmynyń 13-sammıtine tabys tileımin, – dedi Prezıdent.
Qasym-Jomart Toqaev Qazaqstan men Shrı-Lanka arasyndaǵy yntymaqtastyq jóninde aıta kele, teńizdegi jáne óńirdegi turaqtylyqty saqtaý úshin araldaǵy memlekettiń máni zor ekenine nazar aýdardy.
– Eki el arasyndaǵy ózara tyǵyz yntymaqtastyqty nyǵaıtýǵa múmkindik mol, – dedi Memleket basshysy.
Saltanatty shara sońynda Prezıdent dıplomattarǵa tabys tilep, olardyń memleketteriniń basshylaryna júrekjardy sálemin joldady.