10 maýsymnan 11 maýsymǵa qaraǵan túni qalada segiz zań buzýshylyq anyqtaldy. Kalán shekkenderge 15 AEK kóleminde aıyppul (43 755 teńge) salynady.
Almatynyń monıtorıń toptary qoldanystaǵy shekteý sharalarynyń saqtalýyn baqylaý úshin kún saıyn kásipkerlik nysandarǵa baqylaý júrgizip jatyr, dep habarlaıdy Almaty-akshamy.kz.
Monıtorıńtik toptardyń aıtýynsha, kelýshilerdiń kóptigine baılanysty nysandardyń zańsyz qyzmeti áli de tirkelýde. Ashyq jobasyna kirmeıtin mekemeler anyqtaldy.
Mysaly, Bostandyq aýdanyndaǵy 1Gog restobarynda zań buzýshylyq boldy. Monıtorıń tobyndaǵylardyń aıtýynsha, bul mekeme zańǵa qaıshy áreketterimen tekserýshilerdiń nazaryna birneshe ret túsken bolatyn. Ashyq jobasyna kirmeıtindikten,restobardyń jumys jasaýyna ruqsat berilmegen.
Degenmen tekserýshiler 1Gog nysanynyń túngi saǵat 1-de jumys jasaǵanyn anyqtady. İshte 60-qa jýyq adam bolǵan. Kóńil kóteretin orynnyń esigi ashyq. Nysan basshylyǵyn ákimshilik jaýapkershilikke tartý úshin materıaldar jınaqtaldy.
Restobardaǵy karantındik sharalardy buzýmen qatar, kalán shegý faktisi anyqtaldy. Eske salsaq, qoǵamdyq oryndarda kalánǵa tolyq tyıym salynǵan. Tártip buzýshylarǵa qatysty QR Ákimshilik kodeksniń 441-baby 1-bóligi boıynsha ákimshilik hattamalar toltyryldy. Kalán shegý úshin aıyppul 15 AEK (43 755 teńge) quraıdy.
Almatynyń sanıtarlyq dárigerleri kalánnyń zıandy qasıetteri týraly birneshe ret aıtqan, sol arqyly juqpaly aýrýlar, sonyń ishinde koronavırýs ońaı taralady.
Medeý aýdanynyń monıtorıńtik toby maýsymnyń 10-nan 11-ne qaraǵan túni Jibek joly dańǵylyndaǵy Bacha túngi klýbynda zań buzýshylyqty anyqtady. Mekemede 80-ge jýyq adam bolǵan. Kelýshiler áleýmettik qashyqtyqty saqtamaǵan.
Jaýapkershilikke tartý týraly sheshimdi aýdandyq sanıtarlyq-epıdemıologıalyq baqylaý basqarmasy qabyldaıdy.
Taǵy bir zań buzýshylyq Bostandyq aýdanyndaǵy «Vıvaldı» karaokesinde oryn aldy. Kóńil kóteretin oryn túngi saǵat 2.00-den keıin jumys istep, belgilengen jumys rejımin buzǵan.
Eske salsaq, jyl basynan tártip buzýshylarǵa qatysty 74 materıal sotqa berildi. Osy jyly Almatyda 20 naýryz ben 11 maýsym aralyǵynda belgilengen shekteýlerdi buzǵan 1112 jaǵdaı anyqtaldy.
Anyqtalǵan nysandardyń jalpy sanynyń 724-i meıramhanalar, kafeler men dúkender, 135-i kompúterlik klýbtar, 16-sy bılárd klýbtary, 46-sy SPA-salondar, 29-y monsha, 2 kalán barlary, 36-y karaoke klýbtary, 24-i loto klýbtary, 1-i býkmekerlik keńse, 23-i túngi klýbtar. Aýdandyq polısıa basqarmasyna barlyǵy 3337 adam jetkizildi.
Almaty ákimdigi qala turǵyndary men qonaqtaryn karantın rejımin qatań saqtaýǵa, túngi klýbtarǵa, restobarlarǵa, saltanatty is-sharalarǵa, toılarǵa, adam kóp jınalatyn jerlerge barýdan aýlaq bolýǵa shaqyrady.