Oljas Bektenov japondyq JBIC bankiniń tóraǵasy Haıashı Nobýmısýmen ınvestısıalyq yntymaqtastyqty keńeıtý perspektıvalaryn talqylady
Qazaqstan Premer-Mınıstri Oljas Bektenov JBIC (Japan Bank for International Cooperation) Japonıa halyqaralyq yntymaqtastyq bankiniń tóraǵasy Haıashı Nobýmısýmen kezdesti. Qarjy salasyndaǵy yntymaqtastyqty keńeıtý jáne birlesken ınvestısıalyq jobalardy iske asyrý máseleleri talqylandy.
Japonıa Qazaqstannyń Shyǵys Azıadaǵy negizgi seriktesteriniń biri ári búginde úzdik-10 iri ınvestorlar qataryna kiredi. Qazaqstan men Japonıa arasyndaǵy taýar aınalymy ótken jyly 10,5%-ǵa ósip, $2,1 mlrd-qa jetti. Bıylǵy qańtar-mamyr aılarynda ózara saýda kórsetkishi $768 mln-dy qurady. 1993 jyldan beri Japonıanyń Qazaqstan ekonomıkasyna kapıtal salymdarynyń jınaqtalǵan kólemi shamamen $8 mlrd-qa jetti.
Úkimet basshysy JBIC-tiń eki el arasyndaǵy saýda-ekonomıkalyq qatynastardy damytýǵa qosqan eleýli úlesin atap ótti. JBIC Japonıa halyqaralyq yntymaqtastyq banki Qazaqstanda energıamen jáne sýmen jabdyqtaý, taý-ken ónerkásibi, sondaı-aq kólik-logıstıka salalarynda quny $2,3 mlrd bolatyn 26 jobany iske asyrýdy qarjylandyrdy. Qazaqstannyń Damý bankimen birlesip energetıka (JEK qosa alǵanda), kólik salasy, mashına jasaý, azyq-túlik ónerkásibi jáne basqa da basym salalardaǵy birlesken jobalardy $200 mln somasyna qarjylandyrý nıeti boıynsha kelisimge qol qoıý josparlanyp otyr.
«Japonıanyń ońtústiginde oryn alǵan jer silkinisine baılanysty habardy ókinishpen qabyldadym. Eń bastysy, adamdar aman bolyp, tabıǵı apat aýqymdy shyǵyndarǵa alyp kelmeıdi dep úmittenemin. Japonıa – bizdiń negizgi saýda-ekonomıkalyq ári ınvestısıalyq seriktesimiz. Búginde qazaq-japon qatynasy keńeıtilgen strategıalyq áriptestik rýhynda damyp keledi. Qazaqstan Úkimeti yntymaqtastyq kókjıegin keńeıtý nıetin quptaıdy jáne birlesken jobalardy iske asyrýda qajetti qoldaý kórsetýge daıyn», — dep atap ótti Oljas Bektenov.
Óz kezeginde JBIC tóraǵasy Haıashı Nobýmısý ESG (Environment, Sustainability, Governance) sheńberinde «jasyl» qarjy jáne tranzıttik qarjylandyrý salasyndaǵy birlesken ınvestısıalyq jobalardy iske asyrýǵa múddeli ekenin atap ótti.
Kezdesý qorytyndysy boıynsha taraptar barlyq perspektıvaly baǵyttar boıynsha yntymaqtastyqty nyǵaıtýǵa jáne keńeıtýge nıet bildirdi.