«EXPO-2020 Dubai dúnıejúzilik kórmesinde Qazaqstan Respýblıkasynyń Ulttyq pavılonynda usynylǵan «Álem beınesi» art-jobasy Gınnestiń rekordtar kitabynyń sertıfıkatyna ıe boldy. Sertıfıkatty saltanatty tapsyrý rásimi Qazaqstan pavılonynyń sahnasynda ótti», - delingen Qazınvest kompanıasy taratqan aqparatta.

«Álem beınesi» art-jobasy – pavılonǵa álemniń túkpir-túkpirinen kelgen adamdar qylqalam jáne boıaýlardyń kómegimen óz qoltańbasyn qaldyrǵan Jer planetasynyń keneptegi túpbeınesi. Keneptiń ólshemi planetamyzdyń kishireıtilgen fızıkalyq parametrleriniń uzyndyǵy men enine sáıkes keledi. Kartınanyń negizgi ıdeıasy EXPO-2020 Dubai kórmesiniń «Aqyl-oıdy biriktire otyryp, bolashaqty qalyptastyrý» taqyrybymen úndesedi. Art-jobanyń maqsaty – bizdiń ǵalamsharymyzda ómir súretin adamdardy Ulttyq pavılonnyń aýmaǵynda ornalasqan bir óner týyndysy arqyly biriktirý. Kartına – beıbitshilik, birlik, úılesimdilik jáne dostyq sıaqty qundylyqtardyń nyshany.

Búgingi tańda álemniń 193 elinen kelgen 1900-den astam pavılon qonaqtary men kelýshileri kartına betinde ózderiniń «izin» qaldyrdy. Olardyń arasynda álemge tanymal Gollıvýd aktrısasy Baı Lıng, amerıkalyq kásipqoı boksshy Roı Djons, qazaqstandyq rejıser Tımýr Bekmambetov, reseılik ánshi Valerıa, qazaqstandyq kásibı veloshabandoz Aleksandr Vınokýrov jáne basqalary bar.