Jappaı tártipsizdik boıynsha 72 qylmystyq is tirkelgen
Jappaı tártipsizdik kezinde Almaty halyqaralyq áýejaıyna keltirilgen shyǵyn somasy 530 792 668 teńgeni qurady. Bul somaǵa ǵımarattyń ishinde ornalasqan dúkenderge, kasalarǵa, jeke fırmalardyń keńselerine keltirilgen zalal da kiredi, dep habarlaıdy Almaty-akshamy.kz Turkystan.kz cilteme jasap.
İshki ister mınıstrligi Kóliktegi polısıa departamenti bastyǵynyń orynbasary Saryqul Jolanovtyń aıtýynsha, 3-31 qańtar aralyǵynda jappaı tártipsizdik boıynsha 72 qylmystyq is tirkelgen. Bul, negizinen, urlyq pen tonaý.
«Narazylyq aksıalary kezinde qylmystyq elementter memlekettik mańyzy bar nysandarǵa eki shabýyl jasady. Olar – Almaty halyqaralyq áýejaıy jáne áýejaıdaǵy jelilik polısıa bólimi. Sonymen qatar, áýejaı ǵımaratynyń ishinde ornalasqan saýda nysandary shabýylǵa ushyrady. Qylmys jasaǵan 14 kúdikti ýaqytsha ustaý ızolátoryna qamaldy», – dedi departament bastyǵynyń orynbasary.
Kólik polısıasynyń qyzmetkerleri qylmyskerlerden 24,5 mıllıon teńge urlanǵan múlkin tárkilegen. Onyń ishinde úsh kólik, bes uıaly telefon, 2,2 mıllıon teńge jáne 635 myń teńgege baǵalanǵan 47 brendti kıim bar.
Qazir tártip saqshylary qylmystyq is-áreketterge qatysy bar adamdardy anyqtaýǵa baǵyttalǵan jedel izdestirý is-sharalaryn jalǵastyrýda. Polısıa jasaqtary áýejaılar men vokzaldar aýmaǵyn patrúldeıdi. Jelilik bólimshelerdiń bir myńnan astam qyzmetkeri táýlik boıy qyzmet atqarady.
Aıta ketsek, buǵan deıin Almaty qalasynyń ákimdigi 20 ákimshilik ǵımarat, Polısıa departamentiniń 10 beketi, 17 ekopost jáne áýejaı ǵımaratyna keltirilgen shyǵynnyń 22,6 mıllıard teńgeden asatynyn habarlaǵan bolatyn.