Túzetýlerdiń bir blogy otandyq taýar óndirýshilerdi yntalandyrýǵa baǵyttalǵan.
24 qarashada Senattyń jalpy otyrysynda «Salyq jáne búdjetke tólenetin basqa da mindetti tólemder týraly» kodeksine jáne «Salyq jáne búdjetke tólenetin basqa da mindetti tólemder týraly» kodeksin qoldanysqa engizý týraly» QR Zańyna ózgerister men tolyqtyrýlar engizý týraly» zań jobasy qabyldandy, dep habarlaıdy Almaty-akshamy.kz Baq.kz cilteme jasap.
Zańǵa sáıkes, Konstıtýsıalyq Sottyń qurylýyna baılanysty Konstıtýsıalyq sotqa júgingen kezdegi memlekettik bajdy belgileý jáne halyqtyń áleýmettik osal toptaryn bosatý usynylady.
Sondaı-aq 2024 jyldan bastap memlekettik balansty júrgizý toqtatylady. Qorlar jańa júıe boıynsha baǵalanatyn bolady.
Osyǵan baılanysty paıdaly qazbalardy óndirý salyǵyn salý obektisin ózgertý usynylady.
Túzetýlerdiń bir blogy otandyq taýar óndirýshilerdi yntalandyrýǵa baǵyttalǵan.
«Balyq aýlaý kásiporyndary balyqty óńdeý kezde qosylǵan qun salyǵyn 70%-ǵa azaıtýy týraly norma usynylady. Qazir mundaı jeńildikti balyq ósirýshi qojalyqtar qoldanady. Qant óndirisin yntalandyrý úshin shıki qant ımportyn qosylǵan qun salyǵynan bosatý, sondaı-aq qant óndirýshiler úshin qosylǵan qun salyǵy boıynsha jeńildiktiń qoldanylý merzimin uzartý usynylady», – dep atap ótti zańǵa qatysty baıandama jasaǵan Ulttyq ekonomıka mınıstri Álibek Qýantyrov.
Aıtýynsha, zańnyń bir normasy tazartylǵan altyndy satýǵa qatysty. Qazir Ulttyq Bankke mundaı altyndy satý qosylǵan qun salyǵynan bosatylady. Osy normany altyndy zergerlerge de satý kezinde qoldaný usynylady.
Sondaı-aq elektr jelilerin irilendirý máselesi sheshiledi. Energıa berýshi uıymnyń elektr jelilerin óteýsiz alýy kezinde salyq mindettemeleriniń týyndaýyn boldyrmaý qamtylǵan.
«Túzetýlerdiń taǵy bir blogy kólik júıesin odan ári damytý sharalaryn kózdeıdi. Temirjol kóligi salasynda nóldik tarıfti qoldana otyryp, jolaýshylar tasymaldaýshylaryna magıstraldyq temirjol jelisi qyzmetterin kórsetý kezinde salyq salý máselelerin retteý kózdelgen. Sondaı-aq tranzıttik áýe kemelerine janarmaı quıý kezinde qosylǵan qun salyǵynyń nóldik mólsherlemesin qoldanýdy keńeıtý usynylady. Qazir jeńildikti tek áýejaılar qoldana alady. Avtomobıl tasymaldaryn damytý úshin shyǵarylǵan jyly 7 jyldan aspaıtyn ershikti tartqyshtardy bastapqy tirkeý úshin alymnan bosatý usynylady», - dep túsindirdi mınıstr.
Sondaı-aq zań jeke tulǵalardyń tólemderine qatysty bolyp otyr.
«Chek bermeý faktileri týraly habarlaǵany úshin syıaqy alý, ıpotekalyq kredıt boıynsha bereshekti esepten shyǵarý, jaldaý qunyn tómendetý jáne turǵyn úıdi jalǵa alýǵa búdjettik sýbsıdıalar alǵan kezdegi salyqtyq táýekelder alyp tastalady. Sondaı-aq salyqtyq ákimshilendirýdi ońaılatý, sondaı-aq naqtylaý jáne redaksıalyq sıpattaǵy normalar usynylady. Bul negizgi ózgerister», - dedi vedomstvo basshysy.